ەرلان قوشانوۆ: ۇلىتاۋ «رۋحاني جاڭعىرۋ» اياسىنداعى باستى مەگاجوبامىزعا اينالادى

«سانا جاڭعىرماي، قوعام جاڭارماي العا قويعان ماقساتتاردى ورىنداۋ مۇمكىن ەمەس. قاراعاندى وبلىسىندا ەلباسىنىڭ «رۋحاني جاڭعىرۋ» باعدارلاماسى قالاي ىسكە اسىپ جاتقانىن ايتىپ بەرەيىن. بىرىنشىدەن، «رۋحاني جاڭعىرۋ» باعدارلاماسىنداعى اۋقىمدى باعىتتاردىڭ ءبىرى - «قازاقستاننىڭ كيەلى جەرلەرىنىڭ گەوگرافياسى» ەكەنىن بىلەسىزدەر. كيەلى جەرلەر تۋرالى ايتقاندا كوز الدىمىزعا، ارينە،  ۇلىتاۋ كەلەدى. ءبىز  ۇلىتاۋدى - «رۋحاني جاڭعىرۋ» جوباسىنىڭ باستى مەگاجوباسى رەتىندە قاراستىرىپ وتىرمىز. ءوڭىر حالقى ءۇشىن عانا ەمەس، بۇكىل قازاق حالقى ءۇشىن  ۇلىتاۋدىڭ ماڭىزى ەرەكشە»، - دەيدى وبلىس اكىمى.

ايماق باسشىسىنىڭ ايتۋىنشا، مەگاجوبا اياسىندا الداعى ۋاقىتتا ۆيزيت ورتالىعىن اشۋدى جوسپارلانعان. تۋريستەرگە ءبىر تەرەزە ارقىلى وسى ۆيزيت ورتالىعىندا قىزمەت كورسەتىلەدى.

«سول سەكىلدى  ۇلىتاۋدا كيىز ۇيلەردەن قۇرالعان (50 كيىز ءۇي) ەتنواۋىل اشۋ جوسپاردا بار. سونىمەن قاتار، جىل سايىن ءىرى حالىقارالىق ەتنوفەتيۆال وتكىزەمىز.

بۇل شەتەلدىك تۋريستەر ءۇشىن تارتىمدى بولار دەگەن سەنىمدەمىز.  ۇلىتاۋدى بولاشاقتا تولىققاندى تۋريستىك ورتالىق بولار دەپ سەنەمىز. قاراعاندى وبلىسىنىڭ اۋماعىندا ءوزىڭىز بىلەتىندەي، جوشى مەن الاشا، دومباۋىل كەسەنەلەرى ورنالاسقان. ول كەسەنەلەردى يۋنەسكو قۇندىلىقتارى تىزىمىنە ەنگىزۋدى جوسپارلاپ وتىرمىز»، - دەيدى ول.

ەرلان قوشانوۆ سونىمەن بىرگە، سارىارقا پيراميداسى تۋرالى ايتىپ بەردى.

«بۇل 4 مىڭ جىلدان كەلە جاتقان بيعازى ءداندىباي كەزەڭىنە جاتاتىن قاراجارتاس اۋماعىندا ورنالاسقان. ونىڭ اشىلماعان، ءبىز بىلمەيتىن تىلسىم سىرلارى كوپ. ارحەولوگتار جۇمىس جاساپ جاتىر. وسىنىڭ نەگىزىندە تاريحي ارحەولوگيالىق پارك اشۋدى كوزدەيمىز. مەن تاياۋدا عانا سول جاقتاعى ارحەولوگتارمەن كەزدەستىم. ارحەولوگتاردىڭ ايتۋىنشا، سارىارقا پيراميداسى مەن قاراجارتاس قورىمى الەمدىك سەنساتسياعا جاتۋى مۇمكىن دەگەن بولجام ايتىپ وتىر. كەلەر جىلى جاپوندىقتارمەن بىرلەسىپ، حالىقارالىق سيمپوزيۋم وتكىزۋ جوسپاردا بار»، - دەپ ءتۇيدى وبلىس اكىمى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى