داريعا نازاربايەۆا: ءوز ءومىرىڭدى جوسپارلاي الۋ - ۇلكەن باقىت - فوتو
«قازىرگى ۋاقىتتىڭ تالاپ-مىندەتتەرى قىزىق جانە قيىندىقتارى دا از ەمەس. ءبىز بەيبىت ەلدە ءومىر ءسۇرىپ جاتىرمىز، مۇندا تۇراقتى بيلىك، تۇراقتى ساياسات، الداعى بىرنەشە جىلىمىزدىڭ قالاي وتەتىنىن شامامەن باعامداي الامىز. ءتىپتى، ءبىلىم الامىن، ءارى قاراي جۇمىس ىستەيمىن، ءوز ماقساتتارىما جەتەمىن دەپ ءوز ءومىرىڭدى جوسپارلاي الۋدىڭ ءوزى - ۇلكەن باقىت»، - دەدى سەناتور اسكەري-پاتريوتتىق جۇمىستاردى جەتىلدىرۋگە ارنالعان ۆەدومستۆوارالىق كەزدەسۋدە.
كادەت وقۋشىلارى مەن اسكەري-پاتريوتتىق كلۋبتاردا ءبىلىم الاتىن بالالارعا دەپۋتات ماقسات قويا ءبىلۋ قاجەتتىگىن جانە بۇل ماقساتتارعا ءبىلىمدى، ءتارتىپتى ادامنىڭ عانا قول جەتكىزە الاتىنىن باسا ايتتى.
سونىمەن بىرگە، داريعا نازاربايەۆا كەزدەسۋگە كەلگەن دەپۋتاتتار مەن مينيسترلەر نازارىن جاستاردىڭ ازاماتتىق پارىزى مەن جاۋاپكەرشىك سەزىمىن قالىپتاستىرۋ ماسەلەسىنە اۋداردى.
ونىڭ پىكىرىنشە، بۇل باعىتتا مەكتەپتەردەگى اسكەري-پاتريوتتىق كلۋبتار ماڭىزدى ءرول اتقارادى.
«بىزگە جاس اسكەري قۇرىلىمداردى مەملەكەتتىك دەڭگەيدە دامىتۋ مەن قولداۋ بويىنشا بىرەگەي رەسپۋبليكالىق باعدارلاما قاجەت»، - دەپ ءوز ءسوزىن تولىقتىردى داريعا نازاربايەۆا.
اۆتور: ايجان سەرىكجان قىزى
