ارقالىقتان كەلگەن اقىن ەلورداداعى جاس اقىندار ايتىسىنىڭ جەڭىمپازى اتاندى
استانا قالاسى تىلدەردى دامىتۋ باسقارماسىنىڭ مۇرىندىق بولۋىمەن بۇگىن «جاستار» سارايىندا «تاۋەلسىزدىگىم - تەڭدىگىم، ەگەمەندىگىم - ەلدىگىم» اتتى جاس اقىندار ايتىسى ءوتتى.
وعان ەلىمىزدىڭ الماتى، ارقالىق، سەمەي، قىزىلوردا، پاۆلودار، شىمكەنت قالالارى مەن تورعاي، شىعىس قازاقستان وڭىرىنەن 9 ايتىسكەر قاتىستى.
اقىنداردىڭ اتالى ءسوزى تاۋەلسىزدىك، الاش، رۋحاني جاڭعىرۋ، تۋعان جەر، ءتىل تاقىرىپتارىنا ارقاۋ بولدى.
«بۇل جاس اقىندار ايتىسى سونىمەن قاتار استانا قالاسىنىڭ 20 جىلدىعىنا دا ارنالىپ وتىر. اقىندار تاۋەلسىزدىگىمىزدى، استانا قالاسىنىڭ كەشەگىسى مەن بۇگىنىنىڭ، بولاشاعىن، الەمنىڭ وزگە دە استانالارىمەن تەرەزەسىنىڭ تەڭدىگىن جىرلايدى.
مىسالى كەشە 250-260 مىڭ حالىق بولسا، بۇگىنگى كۇنى ءبىر ميلليونعا جەتۋى. ەلىمىزدىڭ، استانامىزدىڭ ەكونوميكاسىنىڭ، ءبىلىمىنىڭ، عىلىمىنىڭ جانە مادەنيەتىنىڭ ءوسۋ جاعدايلارى جىرلانادى»، - دەپ اتاپ ءوتتى استانا قالاسى تىلدەردى دامىتۋ باسقارماسىنىڭ باسشىسى تىلەۋعالي قىشقاشبايەۆ.
ايتىستى وتكىزۋدىڭ ماقساتى - اقىنداردىڭ ورەلى ونەرى، ورنەكتى سوزدەرى ارقىلى تاۋەلسىزدىك مۇراتتارى مەن قۇندىلىقتارىن ناسيحاتتاۋ؛ ەل ەگەمەندىگى جولىنداعى ەلباسىنىڭ اتقارعان يگى ىستەرىن ۇلىقتاۋ؛ «رۋحاني جاڭعىرۋ» باعدارلاماسىنىڭ ماڭىزدىلىعىن پاش ەتۋ؛ وسكەلەڭ ۇرپاقتى وتان سۇيگىشتىككە تاربيەلەپ، ولاردىڭ تانىم-تالعامىن ۇلت رۋحانياتىنا باعىتتاۋ؛ قازاقتىڭ ءتول ونەرى، قۇدىرەتتى ءسوزى ارقىلى مەملەكەتتىك ءتىلدىڭ مەرەيىن ارتتىرۋ، قولدانىس اياسىن كەڭەيتۋ.
قازىلار القاسىنىڭ شەشىمىمەن 1- ورىن توبا وتەپبايەۆقا (ارقالىق)، Ⅱ ورىن ايان نيازبەككە (و ق و) ، Ⅲ ورىن نۇرقانات قايراتقا (پاۆلودار وبلىسى) بەرىلدى.
ال ايبار راعاتوۆ (قوستاناي وبلىسى) بولسا ارنايى جۇلدە يەگەرى اتاندى. جەڭىمپازدار باعالى سىيلىقتارمەن جانە ارنايى ديپلومدارمەن ماراپاتتالدى. قالعان بارلىق قاتىسۋشىلارعا استانا قالاسىنىڭ اكىمى اسەت يسەكەشەۆتىڭ اتىنان العىس حات جانە 50 مىڭ تەڭگە قارجىلاي سىيلىق بەرىلدى.
