ساپاربايەۆ الەم چەمپيوندارىنا پاتەر مەن كولىك سىيلادى

 دەپ حابارلايدى قازاقپارات ءتىلشىسى.

 اقتوبە سپورتشىلارى بيىل جوعارى جەتىستىكتەرگە قول جەتكىزدى. الەم چەمپيوناتتارىنا قاتىسقان بالۋانداردىڭ شوقتىعى بيىك تۇر. ەل نامىسىن قورعاعان سپورتشىلاردى ءوڭىر باسشىسى بەردىبەك ساپاربايەۆ قابىلداپ، ولاردى جەڭىسىمەن قۇتتىقتادى.

 كەزدەسۋگە سامبودان الەم چەمپيونى ەسەت قۋانوۆ، گرەك- ريم كۇرەسىنەن وتكەن الەم چەمپيوناتىنىڭ كۇمىس جۇلدەگەرى مەيرامبەك ايناعۇلوۆ، قىتايدىڭ تايبەە قالاسىنداعى دۇنيەجۇزىلىك ۋنيۆەرسيادادا قولا مەدالدى جەڭىپ العان دزيۋدوشى رۋستام ىبىرايەۆ پەن سوچيدە وتكەن سامبودان الەم چەمپيوناتىنىڭ قولا جۇلدەگەرى اماندىق اساۋ ۇلى شاقىرىلدى.

اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، كەزدەسۋدە كاسىبي سپورتشىلاردى دايارلاۋ جانە بۇقارالىق سپورتتى دامىتۋ سۇراقتارىن تالقىلاندى. «ءبىزدىڭ مىندەتىمىز - سپورتشىلارعا جاعداي جاساپ، زاماناۋي تالاپتار مەن ستاندارتتارعا ساي جاڭا سپورت نىساندارىن سالۋ جانە اشۋ. سىزدەر وبلىستاعى سپورت ينفراقۇرىلىمدارىنىڭ دامۋىنا باسا نازار اۋدارىلىپ جاتقانىنا كۋاسىزدەر جانە بۇل جۇمىس جالعاساتىن بولادى»، - دەدى وبلىس اكىمى بەردىبەك ساپاربايەۆ.

جەڭىسكە جەتىپ، جىلدار بويعى ەڭبەگىنىڭ جەمىسىن كورگەن سپورتشىلارعا ۇنەمى قولداۋ بولادى. وبلىس سپورتشىلارى مەن جاتتىقتىرۋشىلارىنا ارنايى ستيپەنديالار تاعايىندالعان، ۋاقتىلى تولەنەدى. الداعى ۋاقىتتا قازاقستان قۇراما كومانداسىنا ىلىككەن سپورتشىلارعا قولداۋ كورسەتۋ جالعاسادى.

 «ءبىز قاشاندا سىزدەردى قولدايمىز، ال سىزدەر تۋعان جەرىڭىزدىڭ نامىسىن قورعاپ، باپكەرلەرىڭىزدىڭ، اتا- انالارىڭىز بەن جانكۇيەرلەرىڭىزدىڭ ءۇمىتىن اقتاڭىزدار»، - دەدى وبلىس اكىمى.

كەيىن حالىقارالىق جانە رەسپۋبليكالىق جارىستاردا جەڭىسكە جەتكەن سپورتشىلارعا العىسىن ءبىلدىردى. اقتوبە وبلىسىنىڭ اكىمى بەردىبەك ساپاربايەۆ بالۋان مەيرامبەك ايناعۇلوۆقا ءبىر بولمەلى پاتەر، ەسەت قۋانوۆقا اۆتوكولىك كىلتىن تابىس ەتتى. ال رۋستام ىبىرايەۆ پەن اماندىق اساۋ ۇلى 500 مىڭ تەڭگەدەن سىياقى الدى. العىس حاتتار مەن سىياقىلار سپورتشىلاردىڭ باپكەرلەرىنە دە بەرىلدى.

 اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى