جەلتوقسان- قاڭتار ايلارىندا قاتتى اياز بولادى
بۇل تۋرالى ق ر ىشكى ىستەر ءمينيسترىنىڭ ورىنباسارى يۋريي يلين ازاماتتىق قورعاۋ ورگاندارىنىڭ قىسقى كەزەڭگە ازىرلىگى تۋرالى باسپا ءسوز ءماسليحاتىندا ءمالىم ەتتى.
ءمينيستردىڭ ورىنباسارىنىڭ ايتۋىنشا، الەمدىك مەتەوقىزمەتتەردىڭ باسىم بولىگى كەلە جاتقان قىستىڭ ادەتتەگىدەن سۋىق بولاتىنىن بولجاپ وتىر. ق ر ءى ءى م «قازگيدرومەت» ر م ك بولجامدارىنا سۇيەنەدى جانە ولاردىڭ بولجامىنىڭ ناقتىلىعى شامامەن 60 پايىزدى قۇرايدى. «بولجامدارعا سايكەس، جەلتوقسان ايىندا قازاقستاننىڭ سولتۇستىك، سولتۇستىك شىعىس جانە ورتالىعىنداعى اۋا تەمپەراتۋراسى نورمادان تومەن بولادى جانە قار كوپ تۇسەدى. قاڭتار ايىندا دا ەلىمىزدىڭ ورتالىق، سولتۇستىك جانە شىعىس بولىگىندە تەمپەراتۋرا ادەتتەگىدەن تومەن بولادى دەپ كۇتىلۋدە. اقپان ايىندا ەلىمىزدىڭ باتىسى جانە سولتۇستىك باتىسى سۋىتادى»، - دەدى يۋريي يلين ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
سونداي- اق، يۋ. يلين 2018 -جىلى كوكتەمنىڭ ەرتە شىعاتىنىن جانە جاۋىن- شاشىننىڭ كوپ تۇسەتىنىن حابارلادى. سۋ تاسقىنىنا دايىندىق جۇمىستارىن جۇرگىزۋ ءۇشىن تاسقىن سۋ ارنالارى قالىپتاساتىن ورىنداردى باقىلاۋدا ءى ءى م قازگيدرومەت بولىمشەسىندەگى ارىپتەستەرىنىڭ كومەگىنە جۇگىنەتىن بولادى.
اۆتور: ايجان سەرىكجان قىزى
