قىتايدا وتەتىن ازيا چەمپيوناتىنا ءۇش قازاقستاندىق مارافونشى قاتىسادى

ق ر جەڭىل اتلەتيكا فەدەراتسياسىنىڭ حابارلاۋىنشا، 26- قاراشا كۇنى باستالاتىن دودادا 15 ەلدىڭ سپورتشىلارى باق سىنايدى. ۇيىمداستىرۋشىلار تاراتقان مالىمەتكە سايكەس قازىرگە دەيىن 22 ەر، 15 ايەل مارافونشىنىڭ قاتىساتىنى ناقتىلانعان. ولاردىڭ ۇشەۋى قازاقستاندىق سپورتشىلار.

دۋنگۋاندا الەكسەي گۋساروۆ (الماتى)، دانا ايدوسوۆا (الماتى) جانە گۇلجانات جاناتبەك (الماتى وبلىسى) ونەر كورسەتەدى.

الماتىلىق الەكسەي گۋساروۆ پەن دانا ايدوسوۆا باپكەرى سوروكيۆسكيمەن بىرگە ىستىقكولدە ەكى وقۋ-جاتتىعۋ جيىنىن وتكىزدى.

ال گۇلجانات جاناتبەك رەسەيلىك مامان ليليا شوبۋحانىڭ قاراماعىندا دايىندالدى. وسى ۇشەۋىنىڭ اراسىندا مارافونعا جۇگىرۋدەن تەك گۇلجاناتتىڭ عانا تاجىريبەسى بار.

گۋساروۆ بۇعان دەيىن ورتا قاشىقتىققا جۇگىرۋدەن ونەر كورسەتكەن، ايدوسوۆا، ءتىپتى، سپورتتىق جۇرىسكە مامانداعان اتلەت.

ءبىراق جاقىندا ەكەۋى دە ۇزاق قاشىقتىققا جۇگىرۋدى تاڭدادى.

ايتا كەتەيىك، مارافوننان ازيا چەمپيوناتىنان ءبىرىنشى ورىنعا يە بولعان سپورتشىعا 10 مىڭ، ەكىنشى ورىنعا 5 مىڭ، ءۇشىنشى ورىنعا 3 مىڭ دوللار كولەمىندە سىياقى تاعايىندالعان.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى