سامبودان الەم چەمپيونى ءانۇراندى شاتىستىرىپ جىبەرگەن كەزدە قانداي كوڭىل كۇيدە بولعانىن ايتتى
بۇنداي وقيعا جەرلەسىمىز ەسەت قۋانوۆ پەن رەسەيدىڭ اتاقتى پالۋانى اسلان مۋدرانوۆتىڭ سوچيدە التىن مەدال ءۇشىن تالاسىپ جاتقان ساتىىندە بولدى. 62 كەلىدە بەلدەسكەن قوس مىقتى دا قارسىلاستارىن جىعىپ، فينالعا وتكەن بولاتىن. كوپشىلىك مۋدرانوۆتى جەڭىمپاز دەپ تانىپ وتىرعاندا، اقتوبەلىك جىگىت كەزدەسۋدىڭ اياقتالۋىنا نەبارى 26 سەكۋند قالعاندا قارسىلاسىن الىپ ۇردى.
ءبىراق، ەسەت قۋانوۆ التىننان القا تاعىنىپ، تۇعىر تورىنە كوتەرىلگەندە ىڭعايسىز جاعدايعا قالدى. ۇيىمداستىرۋشىلار چەمپيوننىڭ قۇرمەتىنە قويىلۋى ءتيىس ەلىمىزدىڭ ءانۇرانىن ەسكى گيمنمەن شاتاستىرىپ العان.
التىن مەدال يەلەنگەن سپورتشىمىز بۇرىنعى ءانۇران قوسىلعاندا باسىن شايقاپ ونى ءوشىرۋدى وتىنگەنى جۇزىنەن بايقالىپ تۇر. زالدا وتىرعان جەرلەستەرىمىز دە شۋ ەتە قالدى. قاتەلىگىن تۇسىنگەن ۇيىمداستىرۋشىلار گيمندى بىردەن سوندىرگەنىمەن، ونىڭ ورنىنا جاڭاسىن قوسىپ بەرە المادى. سوندىقتان سپورتشىلارىمىز «مەنىڭ قازاقستانىمدى» وزدەرى حورمەن ايتىپ شىققان.
«الەم چەمپيوناتىن ءبىرىنشى رەت ۇتىپ تۇرعان سوڭ ەندى ىڭعايسىزدانىپ قالدىم. سول ءوزىمىزدىڭ سپورتشىلار تىرىدەي ءوز داۋىستارىمەن ءانۇراندى شىرقاپ، كوڭىل-كۇيىمدى كوتەرىپ جىبەردى. كوپ راقمەت، وتانداستارىما!» - دەيدى سامبودان الەم چەمپيونى ەسەت قۋانوۆ.
ال، ەسەتتىڭ باپكەرى ەسكى گيمننىڭ قالايشا قوسىلىپ كەتكەنىن تۇسىنە الماي وتىر. ايتۋىنشا تۋ مەن ءانۇراندى ۇيىمداستىرۋشىلاردىڭ قولىنا اپارىپ بەرگەنبىز دەيدى. ءتىپتى، گيمندى ەستىرتىپ، بارلىعىن شۇقىپ كورسەتكەن.
«سول جەردە وتىراتىن ديدجەيدەن كەتكەن قاتە دەپ ويلايمىن. كۇندە الەم چەمپيونى بولىپ جاتقان جوق. سول ءۇشىن ءانۇرانعا كىشكەنە مۇقيات قاراسا ەكەن دەگەن تىلەك بار»، - دەيدى باپكەر اقەدىل ۇبايەۆ.
كەلەڭسىز جايت ءۇشىن رەسەيدىڭ سامبو فەدەراتسياسى كەشىرىم سۇراپ تا ۇلگەرگەن ەكەن. دەگەنمەن، سپورت مينيسترلىگى ءوز ىشىندە قىزمەتتىك تەكسەرىستى دە باستاپ كەتتى. ەگەر اعاتتىق وزىمىزدەن كەتكەنى انىقتالسا، جاۋاپتىلار جازالانباقشى.
«ۇيىمداستىرۋ جاعىنان ۇلكەن قاتەلىك كەتتى. وسى ءۇشىن ەندى ءبىز فەدەراتسيالارمەن جۇمىس ىستەپ جاتىرمىز. ياعني، ۇيىمداستىرۋ كوميتەتىنە قالاي گيمندى بەرۋ كەرەك. بالكىم باقىلاپ وتىراتىن ادام كەرەك شىعار سولاردىڭ قاسىندا»، - دەيدى سپورت جانە دەنە شىنىقتىرۋ كوميتەتىنىڭ باسپا ءسوز حاتشىسى راۋحان تۇعىمبايەۆا.
باقىلاپ وتىراتىن ادام راسىمەن كەرەك-اق. ويتكەنى، بۇل ەلىمىزدىڭ سيمۆولىنا جاسالعان العاشقى مازاق ەمەس. بۇعان دەيىن كۋۆەيتتە وتكەن مەرگەندەر سايىسىندا توپ جارعان مەرگەنىمىز ماريا دميتريەنكونى ماراپاتتاۋ كەزىندە بوراتتىڭ سايقىمازاق اۋەنى قوسىلعان بولاتىن. سونداي-اق قوستاناي وبلىسىندا شاڭعى فەستيۆالىنىڭ اشىلۋى كەزىندە مەملەكەتتىك ءانۇران ورنىنا ريكي مارتيننىڭ ءانى قويىلعان ەدى.
