قازاقستاندىقتار كوپ سۇرالاتىن انىقتامالاردان بوساتىلادى

«ءبىرقاتار مەملەكەتتىك ورگاندارمەن بىرلەسە «انىقتاماسىز قىزمەت كورسەتۋ» جوباسىن (Paper free) ىسكە اسىرۋ جوسپارلانىپ وتىر. اتالعان جوبا ازاماتتار اراسىندا سۇرانىسقا يە ەلەكتروندى انىقتامالاردى تالاپ ەتۋدى شەكتەۋگە باعىتتالعان»، - دەدى مينيستر ۇكىمەت ساعاتىندا.

 «ازاماتتارعا ارنالعان ۇكىمەت» مەملەكەتتىك كورپوراتسياسىنا جاسالعان تالداۋعا سايكەس، 2016 -جىلى 37 ميلليوننان استام مەملەكەتتىك قىزمەت كورسەتىلگەنى، ونىڭ ىشىندە 23 ميلليوننان استامى نەمەسە 65 پايىزى ەلەكتروندى انىقتامالارعا تيەسىلى ەكەنى بايقالدى.

«سونىمەن بىرگە ەڭ كوپ مەملەكەتتىك قىزمەتتەر 5 انىقتاماعا (ەلەكتروندى انىقتامالاردىڭ 95 پايىزى) تيەسىلى بولىپ وتىر. اتاپ ايتقاندا، مەكەنجاي انىقتاماسى - 15 ميلليون، جىلجىمايتىن مۇلىكتىڭ جوقتىعى تۋرالى - 2,6 ميلليون، تىركەلگەن قۇقىقتار تۋرالى - 2,5 ميلليون، زەينەتاقىلىق ەسەپتەۋلەر جايىندا - 2 ميلليون، سونداي- اق سوتتالماعاندىعى تۋرالى 1,4 ميلليون انىقتاما قامتىلعان. بۇل رەتتە جىل سوڭىنا دەيىن ەلەكتروندىق ۇكىمەتتىڭ ۆەب- پورتالىندا ءۇشىنشى تۇلعالارمەن (بانكتەر، ۇيىمدار جانە باسقالارى) جەكە مالىمەتتەردى الۋدىڭ ارنايى تەتىگى ىسكە اسىرىلادى. ءوز كەزەگىندە sms-ەسكەرتۋ ارقىلى ازاماتتىڭ رۇقساتىن الۋ مىندەتتى تالاپ بولماق»، - دەدى مينيستر.

سونىمەن قاتار «سيفرلىق قازاقستان» جوبالارى بويىنشا مۇددەلى مەملەكەتتىك ورگاندار اقپاراتتىق جۇيەلەرىنىڭ ينتەگراتسياسى بويىنشا شارالار جۇزەگە اسىرىلادى.

«بۇل شارالار ازاماتتا تۇراقتى تۇردە تاپسىرىس بەرەتىن قۇجاتتار ءتىزىمىن وڭتايلاندىرۋعا مۇمكىندىك بەرەدى»، - دەپ تۇيىندەدى ءسوزىن د. ابايەۆ.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى