يمپورتتىق ونىمدەر مەن قىزمەت تۇرلەرىنىڭ تىزبەسى جاسالادى
بۇل كەستە جان-جاقتى تالداۋدان ءوتىپ، ناقتىلانعاننان كەيىن وڭىردەگى تاۋار ءوندىرۋشى كومپانيالارعا تاراتىلادى دەپ حابارلايدى قازاقپارات altaynews.kz سايتىنا سىلتەمە جاساپ.
وندىرىستەگى جەرگىلىكتى ۇلەستى ارتتىرۋ ءۇشىن يمپورتتىق ونىمدەر مەن قىزمەت تۇرلەرىنىڭ تىزبەسى جاسالماق. ءوڭىر اكىمدىگى بۇل قادامعا وڭىرلىك تاۋار وندىرۋشىلەردى قولداۋ ماقساتىندا بارىپ وتىر.
وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى ماقسات مۇساپىربەكوۆ بۇل ماسەلەمەن ارنايى قۇرىلعان كوميسسيا اينالىسىپ جاتقانىن ايتتى. كوميسسيا وڭىردەگى ءىرى كاسىپورىنداردىڭ وندىرىستە تۇتىناتىن ماتەريالدارى مەن قىزمەت تۇرلەرىنە تالداۋ جاساعان.
مىسالى، وسكەمەندەگى جۇيەقۇراۋشى سانالاتىن التى الپاۋىت كاسىپورىن قاجەت ماتەريالدىڭ باسىم بولىگىن ءالى دە بولسا سىرتتان العىزادى. جەرگىلىكتى قۇرامنىڭ ۇلەسى 30 پايىزدىڭ اينالاسىندا.
ال سىرتتان الىناتىن تاۋاردىڭ ءبىرشاما بولىگى وزىمىزدە دە وندىرىلەدى. وسى ماسەلەمەن كوميسسيا مۇشەلەرى «قازتسينك»، «ءۇ م ز»، «ت م ك»، «ارماتۋرا زاۋىتى»، «ازيا-اۆتو» سىندى كومپانيالارعا شىققان ەكەن.
«اتالعان التى كاسىپورىن جىلىنا 206,9 ميلليارد تەڭگەنىڭ تاۋارى مەن قىزمەتىن تۇتىنۋدا. ءبىر جۇبانارلىق جايت، وسى كاسىپورىندارعا كورسەتىلەتىن قىزمەتتىڭ 90 پايىزدان استامى جەرگىلىكتى مەكەمەلەرگە تيەسىلى»، - دەيدى م. مۇساپىربەكوۆ.
جەرگىلىكتى تاۋار وندىرۋشىلەردىڭ تۇيىتكىلدەرىن شەشىپ جۇرگەن بىردەن-ءبىر ۇيىم - «اتامەكەن» كاسىپكەرلەر پالاتاسى. ماقسات مۇساپىربەكوۆ وسى مەكەمەنىڭ ارقاسىندا قۇقىعى تاپتالىپ، وندىرىستەگى ۇلەستەن قاعىلعان بىرنەشە ءوندىرۋشىنىڭ ماسەلەسى دەر كەزىندە شەشىلگەنىن اتادى.
وبلىس اكىمىنىڭ ءبىرىنشى ورىنباسارى نۇرىمبەت ساقتاعانوۆ جەرگىلىكتى تاۋار وندىرۋشىلەر ءوزىنىڭ ەكسپورتتىق الەۋەتىن دە تولىقتاي پايدالانا الماي وتىرعانىن ايتادى.
بۇل الەۋەت يگەرىلسە، سۇرانىستىڭ ازدىعىنان تولىق قۋاتىنا ەنە الماي تۇرعان «مەليسسا»، «كەمونت» سياقتى وزىق تەحنولوگياعا يە كاسىپورىندار ءوندىرىس اياسىن كەڭەيتەر ەدى.
«ەكى جاعىمىزدا ەكى الىپ نارىق جاتىر. اسىرەسە، ەكونوميكالىق وداق اياسىندا رەسەي مەن بەلارۋس ەلدەرىنە تاۋار جەتكىزۋدىڭ مۇمكىندىكتەرى مول. «اتامەكەن» پالاتاسى وسى باعىتتا دا قارقىندى جۇمىس ىستەۋى كەرەك»، - دەيدى نۇرىمبەت ساقتاعانوۆ.
ال وبلىستىق ءماسليحات حاتشىسى ۆلاديمير گولوۆاتيۋك وزىمىزدە وندىرىلەتىن ءونىمدى سىرتتان العىزۋ ادەتى كاسىپورىنداردىڭ اراسىندا تىعىز بايلانىستىڭ جوقتىعىنان جويىلماي تۇر دەگەن پىكىردە.
«وسكەمەندەگى «كەمونت» كومپانياسى ۇسىنىپ وتىرعان ەلەكتر قوندىرعىلارى ساپاسى جاعىنان شەتەلدىك بالامالارىنان ەش كەم ەمەس. سويتە تۇرا، بىزدەگى الپاۋىت كاسىپورىندار ەجەلگى سەرىكتەستەرىنە جۇگىنۋىن جالعاستىرىپ كەلەدى. جەرگىلىكتى ءونىمنىڭ ساپاسىمەن قوسا باعاسى دا، تاسىمالداۋ جانە قىزمەت كورسەتۋ قۇنى دا ارزان.
كاسىپكەرلەر پالاتاسى دا، وبلىستىق باسقارما دا كاسىپورىنداردىڭ اراسىنداعى بايلانىستىڭ نىعايۋىنا ۇدايى كۇش سالىپ وتىرۋى كەرەك»، - دەيدى ول ۆ. گولوۆاتيۋك.
وسى ماقساتتا وڭىردەگى ءىرى كاسىپورىندار تۇتىناتىن تاۋارلارى مەن قىزمەت تۇرلەرىنىڭ كەستەسى تۇزىلمەك. بۇل كەستە جان-جاقتى تالداۋدان ءوتىپ، ناقتىلانعاننان كەيىن وڭىردەگى تاۋار ءوندىرۋشى كومپانيالارعا تاراتىلۋى ءتيىس. تيىسىنشە، شاعىن جانە ورتا بيزنەس نىساندارى ءوز ءوندىرىسىن سول تىزىمگە ىڭعايلاپ قۇراتىن بولادى.
