تۋرنيردە الماتى وبلىسىنىڭ اكىمى ويناعان ۆولەيبول كومانداسى جەڭىسكە جەتتى

جارىسقا قازاقستان، رەسەي، وزبەكستان، موڭعوليا، تۋۆا، بۋرياتيانىڭ كوماندالارى قاتىسۋدا.

تۋرنيردىڭ سالتاناتتى اشىلۋىندا وبلىس اكىمى اماندىق باتالوۆ جەتىسۋ جۇرتشىلىعى اتىنان ارداگەرلەر اراسىنداعى حالىقارالىق تۋرنيرىگە كەلگەن قوناقتاردىڭ قادامىنا ساتتىلىك تىلەپ، قازاقستاندىق «جەتىسۋ» كومانداسىنىڭ ساپىندا وينادى.

«تۋرنيرگە كەلگەن كوماندالاردىڭ ىشىندە اتاقتى ويىنشىلار - ەڭبەك سىڭىرگەن سپورت شەبەرلەرى، ۆولەيبول ويىنىنىڭ ءورىسىن كەڭەيتۋگە كوپ ەڭبەك سىڭىرگەن ازاماتتار بار. ولار - بىرنەشە بۋىن سپورتشىلار ءۇشىن ۇلگى بولعان كاسىبي ماماندار. سوندىقتان بۇگىنگى تۋرنيردى وتكىزۋ ەلىمىزدە، سونىڭ ىشىندە وبلىسىمىزدا ۆولەيبولدى دامىتۋعا جاسالعان جاقسى ءبىر قادام دەۋگە بولادى»، - دەدى ا. باتالوۆ.

سونىمەن قاتار ءوڭىر باسشىسى سپورتتىڭ بۇل تۇرىمەن قازىرگى كەزدە وبلىستىڭ 83 مىڭ تۇرعىن اينالىساتىنىن اتاپ ءوتتى. تەك بيىلعى جىلدىڭ وزىندە عانا 47 ۆولەيبول سەكتسياسى اشىلعان. تۋرنيردىڭ اشىلۋ راسىمىندە سونداي-اق، تۋۆا رەسپۋبليكاسى ۆولەيبول فەدەراتسياسىنىڭ ۆيتسە-پرەزيدەنتى، پارلامەنت ءتوراعاسىنىڭ كومەكشىسى شىڭعىس كامينوۆ، موڭعوليانىڭ ۆولەيبول فەدەراتسياسىنىڭ ۆيتسە-پرەزيدەنتى توگتوحبايار توگسماندال (توعتوبايىر توعىسماندىل) جانە باسقا دا قوناقتار ءسوز الىپ، ۇيىمداستىرۋشىلارعا العىس بىلدىرۋمەن قاتار ويىنشىلارعا ءساتتى قادام تىلەدى.

تۋرنيردى ءبىرىنشى بولىپ قازاقستاننىڭ «جەتىسۋ» كومانداسى مەن بۋرياتيا رەسپۋبليكاسىنىڭ ۆولەيبولشىلارى باستادى.

ەكى پارتيانىڭ ناتيجەسى بويىنشا قۇرامىندا وبلىس اكىمى اماندىق باتالوۆ ويناعان «جەتىسۋ» كومانداسى 2:0 ەسەبىمەن جەڭىسكە جەتتى. مۇنان كەيىن ويىن الاڭىنا رەسەي مەن موڭعوليا كوماندالارى شىقتى.

ايتا كەتەرلىگى، اماندىق باتالوۆ ۆولەيبولدان سپورت شەبەرى، سونىمەن قاتار قازاقستان ۆولەيبول فەدەراتسياسىنىڭ ۆيتسە-پرەزيدەنتى، الماتى قالاسى مەن الماتى وبلىسى ۆولەيبول فەدەراتسياسىنىڭ پرەزيدەنتى.

جالپى ۆولەيبولدان حالىقارالىق تۋرنير ءۇش كۇنگە جالعاسادى، 19- قاراشا كۇنى جەڭىمپاز كوماندا انىقتالادى.

اۆتور: سامال قابىشەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى