استاناداعى «انا مەن بالا» ورتالىعىندا ميدى ەمدەيتىن قىمبات اپپارات پايدا بولدى

ونى ساتىپ الۋعا قاجەتتى قارجىنىڭ ءبىر بولىگى «استانا مارافون-2017» قايىرىمدىلىق شاراسىنان تۇسكەن اقشادان اۋدارىلدى، دەپ حابارلايدى قازاقپارات اكىمدىكتىڭ مەديا ورتالىعىنا سىلتەمە جاساپ.

«انا مەن بالا» ورتالىعىنا ورناتىلعان Tecotem neo اپپاراتى «ايالا» قايىرىمدىلىق قورىنىڭ «باقىلاناتىن گيپوتەرميا» جوباسى اياسىندا ساتىپ الىندى. قۇرالعا قاجەتتى قارجىنى قوردىڭ سەرىكتەستەرى بەرگەن. ال 2900000 تەڭگەنى «استانا مارافون-2017» مارافونىنىڭ قاتىسۋشىلارى جينادى.

«اتالعان اپپارات الەمدە بەلسەندى تۇردە قولدانىلا باستادى. قازاقستاندا العاش بولىپ استانا مەن الماتى قالالارىنا ەكى اپپارات الىندى. كۇتىپ ۇستاسا ون جىلعا دەيىن قىزمەت ەتەدى. جاقىن ارادا ليتۆادان ماماندار الدىرتىپ، اتالعان اپپاراتمەن قالاي جۇمىس ىستەۋ كەرەكتىگىن ۇيرەتەمىز»، - دەدى «ايالا» قايىرىمدىلىق قورىنىڭ مەديتسينالىق جوبالارىنىڭ جەتەكشىسى بەرىك دارجانوۆ.

ونىڭ ايتۋىنشا، گيپوتەرميا ادىستەمەسى الەمدىك تاجىريبەدە كەڭ تارالعانىمەن گيپوتەرميا اپپاراتىنىڭ قولدانىسقا ەنگەنىنە كوپ بولعان جوق.

«بۇل اپپارات اسفيكسيادان كەيىن بالالاردىڭ كۇردەلى جاعدايدان شىعىپ، وڭالۋىنا سەپتىگىن تيگىزەدى. بۇگىندە الەم بويىنشا تۋعان بالالاردىڭ 23 پايىزى وسىنداي دەرتپەن تۋادى. ال قازاقستاندا شامامەن 10 پايىزدى قۇرايدى»، - دەدى دارجانوۆ.

ايتا كەتەيىك، «ايالا» قايىرىمدىلىق قورى ەلىمىزدەگى بالالار مەديتسيناسى سالاسىندا 10 جىلدان بەرى جۇمىس ىستەپ كەلەدى. وسى جىلدار ىشىندە اتالعان قور قازاقستانداعى ءبىرقاتار مەديتسينالىق جانە ءبىلىم بەرۋ مەكەمەلەرى مەن الەۋمەتتىك نىساندارعا قاجەتتى جابدىقتاردى الۋعا قولداۋ ءبىلدىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى