قازاقستاندا «نۇرلى جەر» باعدارلاماسىمەن باسپانا الۋ ءۇشىن جالاقى قانشا بولۋى قاجەت

 بۇل تۋرالى ق ر ينۆەستيتسيالار جانە دامۋ مينيسترلىگى قۇرىلىس جانە تۇرعىن ءۇي- كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ايتتى.

 مينيسترلىك وكىلى تۇرعىن ءۇي قۇرىلىس جيناق بانكىنىڭ سالىمشىلارىنىڭ بيىل ءبىر ميلليونعا جەتكەنىن اتاپ ءوتتى جانە وڭىرلەر مەن باستى قالالارداعى باسپانا باعاسىن سالىستىردى.

 «مەملەكەتتىك باعدارلاما بويىنشا باسپانانىڭ ءاربىر شارشى مەترى وڭىرلەردە 140 مىڭ تەڭگەنى قۇرايدى. ال استانا مەن الماتىدا، اقتاۋ، اتىراۋ قالالارىندا - 180 مىڭ تەڭگە. سايكەسىنشە، ەلۋ شارشى مەتر بولاتىن ەكى بولمەلى پاتەر ايماقتاردا 7 ميلليون تەڭگە جانە استانا، الماتى، اقتاۋ، اتىراۋ قالالارىندا 9 ميلليون تەڭگە. دەمەك، ورتاشا تابىسى 150-200 مىڭ تەڭگەنى قۇرايتىن وتباسى اي سايىن 50-70 مىڭ تەڭگەدەن تولەي الادى. وسىلايشا، 7-10 جىل ارالىعىندا پاتەر قۇنىن تولىق وتەۋگە بولادى»، - دەپ جاۋاپ بەردى م. جايىمبەتوۆ قازاقپارات ءتىلشىسىنىڭ سۇراعىنا.

 ايتا كەتەيىك، ورتالىق كوممۋنيكاتسيالار قىزمەتىندە ق ر ينۆەستيتسيالار جانە دامۋ مينيسترلىگى قۇرىلىس جانە تۇرعىن ءۇي- كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆ «نۇرلى جەر» باعدارلاماسىنىڭ 10 ايداعى قورىتىندىسىن جاريالادى.

جىل باسىنان بەرى قازاقستاندا بارلىق قارجىلاندىرۋ ەسەبىنەن 8,8 ميلليون شارشى مەتر (77 مىڭ باسپانا) پايدالانۋعا بەرىلگەن. اتاپ ايتقاندا، 5,1 ميلليون شارشى مەتر (56,7 مىڭ پاتەر) كوپقاباتتى تۇرعىن ءۇي جانە 3,7 ميلليون شارشى مەتر (24,1 مىڭ پاتەر) جەكە تۇرعىن ءۇي تۇرعىزىلعان

 تۇرعىن ۇيلەردى پايدالانۋعا بەرۋ بويىنشا الدىڭعى قاتاردا استانا (2,2 ميلليون ش. م)، الماتى (1,2 ميلليون ش. م) قالالارى مەن ماڭعىستاۋ (676 مىڭ ش. م)، اتىراۋ (555 مىڭ ش. م) جانە وڭتۇستىك قازاقستان (525,5 مىڭ ش. م) وبلىستارى تۇر.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى