قازاقستاننىڭ قىسقى وليمپيادا تاريحىنداعى جەتىستىكتەرى قانداي؟

سپورتشىلارىمىزدىڭ الداعى - XXIII وليمپياداعا قاتىسۋىنا ءۇش ايعا جۋىق ۋاقىت قالدى.

كەزەكتى قىسقى ويىندار 2018-جىلعى 9-25 اقپان ارالىعىندا وڭتۇستىك كورەيانىڭ پحەنچحان قالاسىندا وتەدى.

وسى ورايدا، قازاقستاندىق سپورتشىلاردىڭ بايراقتى دودا تاريحىنداعى ونەرلەرىن ەسكە الۋدى ءجون كوردىك، دەپ حابارلايدى قازاقپارات.

قىسقى وليمپيادا ويىندارى تاريحىندا قازاقستان ءۇشىن العاشقى مەدالدى قوستانايلىق شاڭعىشى يۆان گارانين جەڭىپ العان بولاتىن. گارانين 1976-جىلى ينسبرۋك قالاسىندا وتكەن XII وليمپيادا ويىندارىندا ەكى قولا مەدال جەڭىپ الدى.

ال 1988-جىلى كالگاريدە وتكەن XV وليمپيادا جارىستارىندا شاڭعىشىلار ۆلاديمير ساحانوۆ - كۇمىس، ۆلاديمير سميرنوۆ قوس كۇمىس پەن قولا مەدال الدى.

ال 1994-جىلى وتكەن XVII قىسقى وليمپياداعا قازاقستان العاش رەت تاۋەلسىز مەملەكەت رەتىندە قاتىسىپ، قانجىعاسىنا 1 التىن، 2 كۇمىس مەدال سالعان بولاتىن. بۇل ءۇش مەدالدىڭ ۇشەۋىن دە شاڭعىشى ۆلاديمير سميرنوۆ جەڭىپ الدى. وسى جۇلدەلەردىڭ ارقاسىندا ەلىمىز جالپى كوماندالىق ەسەپتە 12-ورىنعا ورنالاستى. مىنە، سول ۋاقىتتان بەرى قازاقستان سپورتشىلارى قىسقى وليمپيادا ويىندارىنان بىردە-ءبىر التىن جۇلدە الا الماي كەلەدى.

1998-جىلى جاپونيانىڭ ناگانو قالاسىندا وتكەن ويىندارعا تاعى دا شاڭعىشى ۆلاديمير سميرنوۆ قاتىسىپ، «قولا» ەنشىلەدى. سونداي-اق كونكيمەن جۇگىرۋشى ليۋدميلا پروكاشيەۆاعا دا قولا مەدال بۇيىردى.

وكىنىشكە قاراي، 2002-جىلى ا ق ش- تىڭ سولت-لەيك-سيتي قالاسىندا وتكەن 19- جانە 2006-جىلى يتاليانىڭ تۋرين قالاسىنداعى 20- ويىنداردا وتانداستارىمىزدىڭ ەشبىرى جەڭىس تۇعىرىنان كورىنە العان جوق.

ال 2010-جىلى كانادانىڭ ۆانكۋۆەر قالاسىندا جالاۋى جەلبىرەگەن 21-قىسقى وليمپيادا ويىندارىندا قازاقستاندىق بياتلونشى ەلەنا حرۋستاليەۆا جەكەلەي سىندا كۇمىس مەدالدى جەڭىپ الدى. 2014-جىلى رەسەيدىڭ سوچي قالاسىندا وتكەن سوڭعى قىسقى ويىنداردا مانەرلەپ سىرعاناۋشى دەنيس تەن قوس باعدارلاما بويىنشا 255,1 ۇپاي جيناپ، قازاقستان قورجىنىنا قولا جۇلدەنى سالدى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى