ەۋرازيا تەلەارناسىنداعى «قالاۋلىمنىڭ» باسىنا قارا بۇلت ءۇيىرىلدى
ايتا كەتەرلىگى، بۇگىن «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىنە كەلگەن مينيستر الدىمەن ماڭعىستاۋدان كەلگەن جەكە كاسىپكەر سارا ءجۇسىپوۆانى قابىلداپ، وعان «وبلىستىق مامانداندىرىلعان حالىققا قىزمەت كورسەت ورتالىعىندا» مەديتسينالىق كومەك كورسەتۋ ءۇشىن جالعا العان ورنىنىڭ مەرزىمىن ۇزارتۋ ماسەلەسىنە كومەك بەرۋگە تىرىساتىندىعىن ايتتى. سونىمەن قاتار «تاريحي اتا جۇرت» قوعامدىق بىرلەستىگىنىڭ جەتەكشىسى ۇزبەن قۇرمانباي ۇلىنىڭ بىرلەسىپ ءىس- شارا وتكىزۋ باستاماسىنا قولداۋ كورسەتتى. مۇنان بولەك، داۋرەن اسكەربەك ۇلى بەينەبايلانىس ارقىلى جامبىل مەن وڭتۇستىك قازاقستان وبلىستارى تۇرعىندارىنىڭ وتىنىشتەرىن تىڭدادى.
ماسەلەن، شىمكەنتتەن بايلانىسقا شىققان بلوگەر، زاڭگەر ايگۇل ورىنبەك ۇرپاق تاربيەسىنە نۇقسان كەلتىرەتىن ەۋرازيا تەلەارناسىنداعى «قالاۋلىم» باعدارلاماسىن جابۋ ماسەلەسىن قوزعادى. «قالاۋلىم» باعدارلاماسى بويىنشا الەۋمەتتىك جەلىدە دە جازعان بولاتىنبىز. بۇل باعدارلاماعا قاتىستى زەرتتەۋ دە جۇرگىزىپ كوردىم. تۇركيا ەلىنەن ەكەن. تۇركيانىڭ ۆيتسە- پرەمەرى بۇل باعدارلاماعا قارسى بولىپ، جابىلعان. ياعني، جاستاردىڭ بەيادەپ سوزدەرى، توبەلەسى باعدارلامادا بەلەڭ الىپ كەتكەننەن كەيىن ۇلتتىق مادەنيەتىمىزگە قارسى دە جاپقان. ەندى وزگە ەلدە قاڭسىق دۇنيە بىزگە تاڭسىق بولۋدا. جاستارىمىزدىڭ بۇزىلۋىنا تۇرتكى بولىپ وتىرعان بۇل باعدارلاما نەگە بىزدە كورسەتىلەدى؟ » ، - دەدى ايگۇل ورىنبەك.
«بۇل باعدارلاما تىكەلەي ەفيردە بولا ما؟ قانشا ساعات؟ » ، - دەپ سۇرادى مينيستر. باعدارلامانىڭ 2 ساعات 15 مينۋت بويى تىكەلەي ەفيردە كورسەتىلەتىن ەستىگەن مينيستر: «دەمەك حالىق كورەدى دەگەن ءسوز عوي. ءبىز تەلەارنالارعا وسىنى كورسەتىڭدەر نە كورسەتپەڭدەر دەپ، رەداكسيا ساياساتىنا ارالاسا المايمىز. سودان كەيىن ءسىز ارنايى شاعىم جاساساڭىز تەكسەرۋگە مىندەتتىمىز. ءبىز ونى تەكسەرەمىز، قارايمىز. ايتقانىڭىز دۇرىس. بۇقارالىق اقپارات قۇرالدارى ءبىرىنشى كەزەكتە ەلىمىزدىڭ ازاماتتارىنىڭ ساناسىن جاڭعىرتىپ، تاربيەلەۋى كەرەك. سوندىقتان باعدارلامانىڭ رەداكتورلارىمەن سويلەسۋگە دايىنبىز» ، - دەدى داۋرەن ابايەۆ.
اۆتور: مارلان جيەمباي
