اق جايىقتا اقىن ەسەنعالي راۋشانوۆتىڭ كەشى ءوتتى
دەپ حابارلايدى «قازاقپارات» ءتىلشىسى.
بيىل الپىس جاسقا تولعان اقىندى مەرەيتويىمەن وبلىس اكىمى التاي كولگىنوۆ قۇتتىقتاپ، ەلباسىنىڭ «رۋحاني جاڭعىرۋ» باعدارلاماسى اياسىندا اتالمىش كەشتىڭ ۇيىمداستىرىلعانىن جەتكىزدى.
«اق جايىق ءوڭىرىنىڭ ەرەكشەلىگىن بارشا قازاق ەلى جاقسى بىلەدى. كۇي اتاسى قۇرمانعازى مەن دينا، التى الاشقا ءان وزدىرعان مۇحيت، ونىڭ بەر جاعىندا جۇبان، قادىر سىندى قازاق ادەبيەتىنىڭ قابىرعالى وكىلدەرىنىڭ قاتارى سيرەگەن ەمەس. وسىنداي باي وڭىرگە ارنايى كەلگەن ەسەنعالي راۋشانوۆتىڭ دا قازاق پوەزياسىنداعى ورنى ەرەكشە. «رۋحاني جاڭعىرۋ» باعدارلاماسىنىڭ ءبىر باعىتى ونەر مەن مادەنيەت بولسا، مۇنىڭ ءبارى ءبىزدىڭ ءوسىپ- وركەندەۋىمىزدىڭ كورىنىسى دەۋگە بولادى. ەكونوميكا ەل دامۋىنىڭ ءبىر قاناتى بولسا، رۋحانيات - ەكىنشى قاناتى. ءبىر- ءبىرىنسىز دامۋى مۇمكىن ەمەس»، - دەدى ءوڭىر باسشىسى.
«بەسىگىن انمەن تەربەپ، جوقتاۋىن جىرمەن ايتاتىن قازاقتىڭ ءسوز ونەرىنىڭ ورنى ايرىقشا. قايتا جاڭعىرعان داۋىردە قازاقتىڭ مىقتى اقىندارىنىڭ ءبىرى، وزگەلەرمەن شاتاستىرۋعا بولمايتىن، كوپشىلىكتىڭ ىشىنەن دارا داۋسىمەن تانىلعان ەرەك تالانت يەسى ەسەنعالي راۋشانوۆ دەسەك، ەش ارتىق ەمەس. ەسەنعاليدىڭ جىرلارىنان دالانىڭ بوتاسىنان ارۋاناسىنا دەيىنگى تابيعي مىنەزدى تانىپ، بىلۋگە بولادى. ارۋدىڭ بۇرىمىنداي ادەمى ورىلەتىن قازاقتىڭ قارا ولەڭىمەن- اق ۇلتتىق رۋحتى بيىك كوتەرىپ كەلە جاتقان اقىن. ونىڭ سوناۋ جەلتوقسان كوتەرىلىسى كەزىندە دۇنيەنى ءدۇر سىلكىندىرگەن «قارا باۋىر قاسقالداق» اتتى ولەڭىنىڭ ءوزى نەگە تۇرادى!؟ جاس ۇرپاق وسىنداي رۋحتى جىرلاردى وقىپ ءوسۋى كەرەك»، - دەدى اقىن، قازاقستان جازۋشىلار وداعى ب ق و بولىمشەسىنىڭ ءتورايىمى اقۇشتاپ باقتىگەرەيەۆا.
كەشتە سونداي- اق جازۋشى- باسپاگەر، قازاقستاننىڭ ەڭبەك سىڭىرگەن قايراتكەرى مەرەكە قۇلكەنوۆ ەسەنعالي راۋشانوۆتىڭ 10-سىنىپتا جازعان توپتاما ولەڭدەرىنە كەزىندە ۇلى اقىندارىمىزدىڭ ءبىرى جۇمەكەن ناجىمەدەنوۆتىڭ باسىن شايقاپ، تامسانعانىن ايتىپ، ونىڭ سوزدىك قورىنىڭ مولدىعىنا قازاق ادەبيەتىنىڭ كوريفەيلەرى ءابىش كەكىلبايەۆ پەن فاريزا وڭعارسىنوۆا تاڭعالىپ وتىراتىنىن جەتكىزدى.
«ەسەنعالي جىرلارىنان ۇلى جىراۋلاردىڭ ۇلىق سارىنى انىق سەزىلەدى. وسىدان التى ءجۇز جىل بۇرىن قارعا بويلى قازتۋعان جىراۋدىڭ ەدىل مەن جايىق بويىنان بارماعىن قارس- قارس شايناپ، قالاي كەتكەنى ەلدىڭ جادىنان وشە قويعان جوق. شىلبىرىن سۇيرەتىپ، شىنجىرىن ءۇزىپ كەتكەن قازتۋعاننىڭ، مىنە، سول جىرى اراعا عاسىرلار سالىپ، ەسەنعاليدىڭ كوكمويناق تۇلپارىن ءمىنىپ، ەسەنعالي بولىپ قايتا ورالدى»، - دەدى اقىن، تولەگەن ايبەرگەنوۆ اتىنداعى سىيلىقتىڭ لاۋرەاتى سۆەتقالي نۇرجانوۆ.
شىعارماشىلىق كەشتە اقىننىڭ ولەڭدەرى وقىلىپ، سوزدەرىنە جازىلعان اندەر ورىندالدى.
«اقىن ەل الدىنا شىعىپ، ولەڭ وقىعاندا، حالىقتى ۇيرەتەمىن دەمەۋى كەرەك. قايتا ودان ۇيرەنەمىن دەۋى كەرەك. سوندىقتان مەنى قولدايتىن جۇرتشىلىقتىڭ بارىنە باسىمدى يەمىن»، - دەدى اقىن، مەملەكەتتىك سىيلىقتىڭ يەگەرى ەسەنعالي راۋشانوۆ.
