بۇيرەگىن اۋىستىرعان ءجاميلا بايسەرىكوۆا اۋرۋحانادان شىقتى - فوتو

 دارىگەرلەر بويجەتكەننىڭ دەنساۋلىعى جاقسى دەپ باعالاپ وتىر.

ءجاميلانى شىعارىپ الۋعا دونور جىگىت ابزال، الماتىداعى «قايىرىمدى جاندار» ەرىكتىلەر توبى كەلدى.

ءجاميلا قان قىسىمىنىڭ ۇنەمى جوعارى بولۋىنان قۇلاعى ەستىمەي، جۇرە الماي قالعان ەدى.

قازىر بويجەتكەن اۋرۋحانادان ءوز اياعىمەن شىعىپ كەتتى.

«بۇيرەك اۋىستىرۋ - وتە كۇردەلى وپەراتسيالاردىڭ ءبىرى. ءدال ءجاميلانىڭ جاعدايىنا كەلسەك، بۇل پاتسيەنتتىڭ گەمودياليزدەن قالعان ءبىرقاتار اسقىنۋلارى بولعان. ءجاميلانىڭ وكپەسىندە سارى سۋ، پەريكارديت، قانازدىق بولعان. قان قىسىمى وتە جوعارى، جۇرە الماي قالعان، تابەتى بولماعان، قۇلاقتاعى شۋدان ەستۋ قابىلەتى ناشارلاپ كەتكەن. سوعان قاراماستىن وتا ءساتتى ءوتتى. بۇل اسقىنۋلاردىڭ ءبارى قازىر جوق. ءجاميلا ەندى گەمودياليز اپپاراتىنا جاتپايدى، قىسىم تۇسىرەتىن ءدارى ىشپەيدى، قان كورسەتكىشتەرى جاقسارا ءتۇستى. قۇلاعى ەستي باستادى. ەندى ءجاميلانى وبلىستىق دارىگەرلەرگە تاپسىرىپ جاتىرمىز. ءبىزدىڭ ترانسپلانتولوگيا سالاسىنىڭ دامىعانىنىڭ ءبىر كورىنىسى - بۇيرەك الماستىرعان ناۋقاستى قاشىقتاعى دارىگەرلەر دە باقىلاي الادى. ءارى مەملەكەت قاجەتتى ءدارى- دارمەكپەن تەگىن قامتيدى»، - دەدى ا. سىزعانوۆ اتىنداعى ۇلتتىق عىلىمي حيرۋرگيالىق ورتالىقتىڭ باۋىر ترانسپلانتاتسياسى جانە ۋرولوگيا ءبولىمىنىڭ مەڭگەرۋشىسى راۆيل يبراگيموۆ.

ءجاميلا بايسەرىكوۆا ەندى شىمكەنتتە دارىگەرلەردىڭ باقىلاۋىندا بولماق.

اناسى مەن قىزىن ولاردىڭ تۋعان بالاسىنداي بولىپ كەتكەن ابزال ءادىلوۆ شىمكەنتكە دەيىن جەتكىزىپ سالماق.

«ءبىرىنشى اللا ەكىنشى قايىرىمدى جانداردىڭ كومەگى عوي. كومەكتەسىپ جاتقان بارشا حالىققا راحمەتىمدى ايتام. بۇگىنگە دەيىن حابارلاسىپ تۇرعان ادامدار بار. سونىڭ ءوزى ۇلكەن كۇش. ءالى دە قاۋىپ بار. اپتا سايىن اناليز وتكىزۋىمىز كەرەك ەكەن. بەرگەن دارىلەردى ۋاقىتىندا ۇزبەي ءىشۋ كەرەك. ارى قاراي ءومىرىن بەرسىن دەپ جاتىرمىن پەرزەنتىمنىڭ. تاڭنان بەرى دايىندالىپ ءجۇر مەنىڭ قۇلىنىم. بۇرىن 2 بالام بار ەدى. ەندى مەنىڭ 3 بالام بار»، - دەدى اناسى قۇرمانگۇل قۇلمىرزايەۆا.

«ابزالعا، ماعان كومەكتەسكەن حالىققا كوپ راحمەت»، - دەدى ءجاميلا.

بۇل وقيعانى العاش رەت و ق و جۋرناليستەرى كوتەرگەن بولاتىن.

25 جاستاعى ءجاميلانىڭ 2014 -جىلى قوس بۇيرەگى ىستەن شىعىپ، وتباسى قازاقستاندىقتاردان كومەك سۇراعان ەدى. 2,5 جىلدان بەرى گەمودياليز اپپاراتىنا تاڭىلىپ كەلگەن بويجەتكەنگە ورالدىق جىگىت ابزال ءادىلوۆ بۇيرەگىن تەگىن بەردى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى