دينوزاۆردىڭ جۇمىرتقاسى تابىلدى
زەرتتەۋشىلەردىڭ ايتۋىنا قاراعاندا، بۇل بور ءداۋىرىنىڭ كەزەڭىنە جاتاتىن كورىنەدى. رەسەي اۋماعىنان ءبىرىنشى رەت تابىلىپ وتىرعان دەرەك كوزى ەندى ءبىرتالاي قۇندى مالىمەتتەرگە جول اشاتىنى ءسوزسىز. قازىر بۇل ماسەلەنى زەرتتەۋمەن سانك- پەتەربۋرگتىڭ عالىمدارى دا اينالىسۋدا. ماماندار قالاي ايتقاندا، «بۇل - باعا جەتپەس تاريحي دەرەك. دەمەك، رەسەي تەرريتورياسى دا دينوزاۆرلاردىڭ مەكەنىنە اينالعان» دەپ وتىر.
وسى ۋاقىتقا دەيىن دينوزاۆرلاردىڭ جەر بەتىنەن جويىلۋىنا قاتىستى ءارتۇرلى بولجامدار ايتىلىپ كەلدى. ءبىراق سوڭعى ونداعان جىلداردا تابىلىپ جاتقان دەرەكتەر تىڭ مالىمەتتەرگە جول اشقانداي. قازىرگى كەزدە الىپ جانۋارلاردىڭ ءارتۇرلى سۇيەكتەرى مەن قاڭقالارى، ءتىپتى جۇمىرتقالارى جەر شارىنىڭ ءار ەلدىمەكەنىنەن تابىلىپ جاتىر.
وسىدان ءبىراز جىل بۇرىن پالەونتولوگ ماماندار قىتايدىڭ گوبي قۇمدى شولەيتتى ايماعىنان دينوزاۆردىڭ ۇلكەندى- كىشىلى جۇمىرتقاسى تابىلعانىن جاريا ەتكەن. ىزدەستىرۋ، قازۋ جۇمىستارى كەزىندە الىپ جانۋارلاردىڭ ءىرى جۇمىرتقاسى ارگەنتينا تەرريتورياسىندا دا كەزدەسكەن. رەسەيلىك عالىمدار كەمەروۆو وبلىسىنىڭ شەستاكوۆا دەريەۆنياسىن «دينوزاۆرلار وشاعى» دەپ اتايدى. مۇنىڭ دا سەبەبى بار. ويتكەنى اتالعان سەلودان ەرتە زاماندا ءومىر سۇرگەن كىشى جانە الىپ حايۋاناتتاردىڭ سۇيەكتەرى كوپ تابىلعان. سونداي- اق باسقا دا جانۋارلاردىڭ قاڭقالارى كەزدەسكەن.
جالپى مۇنداي «قۇندى جادىگەرلەر» مونعوليا اۋماعىندا دا بار ەكەنىن بۇعان دەيىن ماماندار عىلىمي تۇجىرىمدامالارمەن دالەلدەپ، ايتىپ كەتكەن. ال جاپون ماماندارىنىڭ دەرەگىنە قاراعاندا، وسىدان 66 ميلليون جىل بۇرىن ديامەترى 9 شاقىرىم بولاتىن الىپ استەرويد جەرگە قۇلاماعاندا، مۇمكىن دينوزاۆرلار بۇگىنگى كۇنگە دەيىن ءومىر سۇرەر مە، ەدى، كىم ءبىلسىن؟ !
جالپى دينوزاۆرلاردىڭ جويىلۋىنا قاتىستى بولجامدار كوپ. الىپ جانۋارلاردىڭ جەر بەتىن ءبىر كەزدەرى مەكەن ەتكەنى، ول ەندى اقيقات.
ەركىن قالدان
«ايقىن»
