بايقوڭىردىڭ ءبىراز جەرى قازاقستانعا قايتارىلعانىمەن، جالعا بەرۋ قۇنى وزگەرمەيدى

بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ ايتتى، دەپ حابارلايدى قازاقپارات.

«بۇل 11,5 مىڭ گەكتار جەر. وزدەرىڭىز بىلەسىزدەر، تورەتام ستانساسى مەن اقاي ەلدى مەكەنى بار. سولاردىڭ توڭىرەگىندەگى جەرلەردى قايتارىپ جاتىرمىز. سەبەبى ەكى ەلدى مەكەننىڭ حالىق سانى ءوسىپ، قۇرىلىس جۇمىستارى دا ارتىپ كەلەدى. سوندىقتان حالىققا جەر كەرەك. ءبىز  قىزىلوردا وبلىسى اكىمشىلىگىمەن بىرلەسىپ، جالعا بەرىلگەن اتالعان جەردى قايتارىپ جاتىرمىز. ول سىردىڭ، تەمىرجولدىڭ بويىندا جاتقان جەرلەر»، - دەدى بەيبىت اتامقۇلوۆ.

ونىڭ ايتۋىنشا، اتالعان جەرلەر ەش ۋاقىتتا تەحنيكالىق وڭدەۋدەن وتپەگەن. جالپى، بايقوڭىر توڭىرەگىندەگى جەرلەردىڭ بارلىعى دا ەكولوگيالىق تۇرعىدا تازا.

«كەلىسىلگەن شارتقا سايكەس جالدىڭ سوماسى تومەندەمەيدى. ماسەلەن، 42, 43 جانە 45-الاڭدار دا قازاقستانعا وتەدى. ءبىراق، جالداۋ قۇنى وزگەرىسسىز قالادى - 115 ميلليون دوللار»، - دەدى مينيستر.

ايتا كەتەرلىگى، چەليابينسكىدە وتكەن قازاقستان مەن رەسەيدىڭ XIV ءوڭىرارالىق ىنتىماقتاستىعى فورۋمى اياسىندا «بايقوڭىر» كەشەنىن جالعا بەرۋ شارتىنا وزگەرىستەر ەنگىزۋ تۋرالى حاتتاماعا قول قويىلدى.

قۇجاتقا سايكەس، بايقوڭىرعا جاقىن ورنالاسقان اقاي جانە تورەتام اۋىلدارىنداعى 11,6 مىڭ گەكتار جەر رەسەيگە جالعا بەرۋ اۋماعىنان شىعارىلىپ،  قىزىلوردا وبلىسىنا قايتارىلادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى