مۇحامەدي ۇلىنىڭ جاۋابى ۇكىمەت باسشىسىنىڭ قالجىڭىنا ىلىك بولدى

وتىرىستا ارىستانبەك مۇحامەدي ۇلى 2018-جىلدىڭ اقپان ايىندا كورەيانىڭ پحەنچحان قالاسىندا وتەتىن 23- قىسقى وليمپيادا ويىندارىنا سپورتشىلارىمىزدىڭ دايىندىعى تۋرالى بايانداعان بولاتىن.

مينيستر بايانداماسىن اياقتاعاننان كەيىن ۇكىمەت باسشىسى قانشا مەدال الۋ جوسپارلانىپ وتىرعانىن سۇرادى.

«باقىتجان ءابدىر ۇلى، «مەرەيلى بولۋعا ءماجبۇر» دەگەن ءسوز بار ەدى»، - دەدى ارىستانبەك مۇحامەدي ۇلى پرەمەر-مينيسترگە قاراتا.

«ولاي بولسا جاقسى، سىزگە وليمپياداشىلارىمىزدىڭ دايندىعىنىڭ سوڭعى كەزەڭىن ساپالى وتكىزۋ تاپسىرىلادى. جانە مەدال كۇتەمىز. سىزدە باسقا نۇسقا قالمايدى، ءماجبۇرسىز»، - دەپ كۇلدى باقىتجان ساعىنتايەۆ.

ايتا كەتەرلىگى، مينيسترلىك مالىمەتىنشە، 2016-2017-جىلدىڭ ماۋسىمىندا قازاقستاننىڭ قىسقى سپورت تۇرلەرىنەن قۇراما كومانداسى چەمپيوناتتاردا، الەم كۋبوكتارىندا جانە باسقا دا حالىقارالىق جارىستاردا 129 مەدال جەڭىپ الدى. ونىڭ 37 ءسى التىن، 38 كۇمىس جانە 54 ءى قولا مەدال.

ەسكە سالا كەتەيىك، XXIII قىسقى وليمپيادا ويىندارى 2018-جىلى 9- اقپان كۇنى پحەنچحان قالاسىندا باستالىپ، 25 -اقپانعا دەيىن جالعاسادى. جارىستارعا 95 ۇلتتىق وليمپيادا كوميتەتىنىڭ اتىنان 2900 سپورتشى قاتىسادى دەپ كۇتىلۋدە. سپورتتىڭ 15 تۇرىنەن جالپى 102 مەدال جيىنتىعى ساراپقا سالىنادى.

مينيستر مۇحامەدي ۇلى اتاپ وتكەندەي، قازاقستان پحەنچحان وليمپياداسىنا سپورتتىڭ 9 تۇرىنەن قاتىسادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى