قازاقستان پحەنچحان وليمپياداسىنا سپورتتىڭ قانشا تۇرىنەن قاتىسادى؟

بۇل تۋرالى بۇگىن ۇكىمەتتىڭ سەلەكتورلىق رەجيمدەگى وتىرىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتتى، دەپ حابارلايدى قازاقپارات.

«2018-جىلعى 9- اقپاندا كورەيا رەسپۋبليكاسىنىڭ پحەنچحان قالاسىندا باستالاتىن 23-قىسقى وليمپيادا ويىندارىنىڭ اشىلۋىنا 86 كۇن قالدى. وزدەرىڭىزگە بەلگىلى، 4 جىلدا ءبىر رەت وتەتىن وليمپيادا ويىندارى الەمدىك سپورتتىڭ ەڭ بيىك شىڭى. 2017-جىلعى الماتى قالاسىندا وتكەن دۇنيەجۇزىلىك قىسقى ۋنيۆەرسيادانى جوعارى دەڭگەيدە وتكىزۋدەن جانە وندا ساپالى ونەر كورسەتۋدەن كەيىنگى مينيسترلىكتىڭ ماڭىزدى ماسەلەسى پحەنچحان قالاسىندا 2018-جىلى وتەتىن وليمپيادا ويىندارىنا سپورتشىلاردىڭ ليتسەنزيالىق جارىستاردا ساپالى ونەر كورسەتۋىن جانە جاقسى فۋنكتسيونالدىق جاي-كۇيىنىڭ بولۋىن قامتاماسىز ەتۋ بولىپ تابىلادى»، - دەدى مينيستر.

ونىڭ دەرەگىنشە، كورەيادا وتەتىن وليمپيادا ويىندارىنا الەمنىڭ 80 نەن استام ەلىنەن 5 مىڭنان اسا سپورتشىنىڭ جانە رەسمي تۇلعالاردىڭ قاتىسۋى جوسپارلانعان.

وليمپيادادا سپورتتىڭ 15 ءتۇرى بويىنشا 102 مەدال جيىنتىعى ساراپقا سالىنادى. قازاقستاننىڭ سپورتتىق دەلەگاتسياسى 9 سپورت تۇرىنەن قاتىسۋدى جوسپارلاپ وتىر.

ولار بياتلون، مانەرلەپ سىرعاناۋ، تاۋ شاڭعىسى، شورت-ترەك، كونكيمەن جۇگىرۋ، شاڭعى، شانا سپورتى، شاڭعىمەن ترامپليننەن سەكىرۋ، فريستايل، اكروباتيكا موگۋل جارىستارى.

«قازاقستان قىسقى وليمپيادا ويىندارىنا جەكە كوماندا رەتىندە تۇڭعىش رەت 1994-جىلى ليللەحاممەر قالاسىندا ونەر كورسەتكەنى بارشامىزعا ءمالىم. تاۋەلسىزدىك جىلدارىندا ۇلتتىق قۇراما كوماندا 7 وليمپيادا مەدالىن جەڭىپ الدى. ونىڭ ىشىندە 1 التىن، 3 كۇمىس جانە 4 قولا مەدال بار»، - دەدى ارىستانبەك مۇحامەدي ۇلى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى