تاياۋ شىعىس پەن ورتالىق ازيادا تۇششى سۋ توڭىرەگىندەگى شيەلەنىس ۋشىعۋى ىقتيمال - نازاربايەۆ
بۇل تۋرالى بۇگىن استانا كلۋبىنىڭ ءۇشىنشى وتىرىسىندا ءسوز سويلەگەن قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.
«ادامداردىڭ ءومىرىن قامتاماسىز ەتەتىن رەسۋرستاردىڭ شەكتەۋلىگى پروبلەماسى دا لايىقتى نازارعا الىنىپ وتىرعان جوق. ەڭ الدىمەن، بۇل تۇششى سۋدىڭ جەتىسپەۋشىلىگىنە قاتىستى. ول ءۇشىن كۇرەس مەملەكەتارالىق قاراما-قايشىلىقتىڭ كوزىنە اينالۋدا. سۋ رەسۋرستارىنىڭ تاپشىلىعى پاكىستان مەن ءۇندىستاننىڭ اراسىنداعى قارىم-قاتىناستى ۋشىقتىردى. بىلەتىنىمىزدەي، وتكەن جىلدىڭ كۇزىندە ءۇندىستان 1960-جىلدان جۇمىس ىستەپ كەلە جاتقان يند وزەنى جونىندەگى ەكىجاقتى كوميسسيانىڭ جۇمىسىن توقتاتاتىندىعىن مالىمدەدى. تاياۋ شىعىس پەن ورتالىق ازيادا دا ۋشىعۋ ىقتيمالدىعى جوعارى»، - دەدى قازاقستان پرەزيدەنتى.
مەملەكەت باسشىسى جەر شارىنداعى حالىق سانىنىڭ ارتۋىنا بايلانىستى الەمنىڭ جەكەلەگەن وڭىرلەرىندە ازىق-تۇلىك داعدارىسى ورىن الۋى مۇمكىن ەكەندىگىن دە ەسكەرتىپ ءوتتى.
ەگىستىك القاپتارىنىڭ قىسقارىپ، توپىراقتىڭ قۇنارلىلىعى تومەندەپ بارا جاتقانىن دا ەسكە سالدى.
«ساراپشىلاردىڭ ەسەپتەۋىنشە، تاياۋ 40 جىلدىڭ ىشىندە استىقتىڭ ەگىستىك القاپتارىن كەمىندە 2 ەسەگە ۇلعايتۋ قاجەت بولادى. بۇل رەتتە ەۋرازيالىق ەلدەردەگى، ونىڭ ىشىندە اۋىل شارۋاشىلىعى تاۋارلارىن ءىرى ءوندىرۋشى رەتىندە قازاقستانداعى اۋىل شارۋاشىلىعىن ينتەنسيفيكاتسيالاۋ دا ماڭىزدى»، - دەدى نۇرسۇلتان نازاربايەۆ.
اۆتور: مارلان جيەمباي
