قازاقستاندا اۆتوساقتاندىرۋ تولەمىنىڭ مولشەرىن كوتەرۋ كوزدەلىپ وتىر
بۇل تۋرالى پارلامەنت ماجىلىسىندە «ق ر كەيبىر زاڭنامالىق اكتىلەرىنە ساقتاندىرۋ جانە ساقتاندىرۋ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعاننان كەيىن تىلشىلەردىڭ ساۋالىنا جاۋاپ بەرگەن ق ر ۇلتتىق بانك ءتوراعاسىنىڭ ورىنباسارى جانات قۇرمانوۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«ءبىز ساقتاندىرۋ ۇيىمدارىنىڭ جاۋاپكەرشىلىگىن ارتتىرۋدى جوسپارلاپ وتىرمىز. سەبەبى ديەۆالۆاتسيانىڭ سالدارىنان كولىك قۇرالدارىنىڭ باعاسى ءوسىپ كەتكەنىن بىلەسىزدەر. سونىمەن بىرگە، ءبىز ادامداردىڭ ومىرىنە جانە دەنساۋلىعىنا زيان كەلتىرىلگەن جاعدايدا ادامداردىڭ قاۋىپسىزدىگىن ارتتىرۋدى كوزدەدىك. سەبەبى قازىرگى ۋاقىتتا قاراستىرىلعان سوما بۇگىنگى كۇننىڭ تالابىنا ساي كەلمەيدى»، - دەيدى جانات قۇرمانوۆ.
ونىڭ ايتۋىنشا، بۇل تۇرعىدا حالىقارالىق تاجىريبە كەڭىنەن زەرتتەلگەن.
«ءبىز حالىقارالىق تاجىريبەلەر مەن ليميتتەردى زەرتتەدىك. ينتەگراتسيا اياسىندا ءبىزدىڭ ساقتاندىرۋ كومپانيالارىنىڭ جاۋاپكەرشىلىك ليميتتەرىن ۇيلەستىرۋ ءۇشىن رەسەيلىك تاجىريبەنى ساراپقا الدىق. بۇل تۇرعىدا ەسەپ جۇرگىزۋ كەرەك. قازىرگى ۋاقىتتا ناقتى ساندى ايتا المايمىن، ءبىراق پايىزدىق مولشەردە 50 پايىزدان تومەن بولماۋى كەرەك»، - دەيدى ج. قۇرمانوۆ.
ول سونىمەن بىرگە، ءار مەملەكەتتە ساقتاندىرۋ سوماسى ءار ءتۇرلى ەكەنىن اتاپ ءوتتى.
«كەيبىر مەملەكەتتەردە ەگەر ساقتاندىرۋعا قاتىستى جاعداي تۋىنداي قالسا، ساقتاندىرۋ توقتاتىلادى. سەبەبى كومپانيا ءبىرىنشى جاعداي بويىنشا عانا وزىنە جاۋاپكەرشىلىك الۋى ىقتيمال. البەتتە، ودان كەيىن ساقتانۋشى جاڭا ساقتاندىرۋدى ساتىپ الۋى كەرەك بولادى. ءبىراق ءبىز بۇگىن دەپۋتاتتارمەن سۇراقتى تالقىلاپ، حالىق ءۇشىن بۇل جول قولايسىز دەگەن دە پىكىرلەر ايتىلدى. ءبىز بۇل ماسەلەگە قايتا ورالامىز»، - دەيدى ءتوراعانىڭ ورىنباسارى.
اۆتور: ايان بەكەن ۇلى
