كورەياعا جۇمىسقا كەتكەن شىمكەنتتىك قىلمىس جاسادى دەپ ايىپتالۋدا
23 جاستاعى امانات جۇماشتىڭ اتا-اناسى بۇل كىنانىڭ جالا ەكەنىن ايتىپ، بيلىكتەن كومەك سۇراپ وتىر، دەپ حابارلايدى قازاقپارات ءتىلشىسى.
شەتەلدە ءناپاقا تاۋىپ جۇرگەن قازاقستاندىق جىگىت قازىر قاماۋدا. ونىڭ اكەسى قايسار شەرىمنىڭ سوزىنە قاراعاندا، ۇلى وسى جىلدىڭ اقپان ايىندا كورەياعا جۇمىسقا كەتكەن. سەبەبى اناسى وبىر دەرتىنە شالدىققان سوڭ، ونىڭ ەمىنە كوپ قاراجات كەرەك بولىپتى. ءبىراق امانات شەتەلدە ءجۇرىپ كەلەڭسىز جاعدايعا تاپ بولعان.
«وڭتۇستىك كورەيا ەلىنىڭ ازاماتشاسى ۇلىم اماناتتىڭ ۇستىنەن زورلادى دەپ پوليتسياعا ارىزدانعان. مەن بالامنىڭ بۇل قىلمىستى جاساماعانىنا تولىق سەنىمدىمىن. ويتكەنى ول مۇنداي قىلمىسقا بارمايدى. ونىڭ جازىقسىز قامالعانىن جانىنداعى جولداستارى دا ايتىپ وتىر. ءبىراق ايتايىن دەسە كارىس ءتىلىن بىلمەيدى. بولماعان سوڭ ەلشىلىككە دە حات جازىپ، كومەك سۇرادىق. ول جاقتاعىلار زاڭسىز جۇمىسقا بارعاندارعا كومەكتەسە المايمىز، تەك باقىلاۋدا ۇستايمىز دەپ قىسقا جاۋاپ بەردى»، - دەيدى قايسار شەرىم.
بەلگىلى بولعانداي، امانات جۇماش وڭتۇستىك كورەيادا ءار ءتۇرلى جۇمىس ىستەگەن. ونى پوليتسيا قاماپ قويعانى جونىندە سول ەلدە جۇرگەن جولداستارى حابارلاپتى.
«بالامنىڭ جانىنداعى دا جۇمىسقا زاڭسىز تۇردە بارعان. سوندىقتان ولاردى دا كۋاگەر بولۋعا جىبەرمەي وتىر ەكەن. ايتپەسە بولعان جاعدايدى ايتىپ، كۋاگەر بولۋعا دايىنبىز دەپ وتىر. ونىڭ ۇستىنە ءبارىنىڭ دە كارىس ءتىلىن بىلمەيتىنى بار. مەن ەلىمىزدىڭ سىرتقى ىستەر مينيسترلىگىنەن كومەك سۇرايمىن. وسى ىسكە ارالاسسا، ءىستىڭ اق قاراسىن انىقتاۋعا كومەكتەسسە ەكەن. قازىر ءبىز سول جاققا بارۋعا جولعا اقشا جيناپ جاتىرمىز. ونىڭ وزىنە ءبىر ميلليون تەڭگەدەن كوپ قاراجات كەتەدى»، - دەيدى امانات جۇماشتىڭ اكەسى.
قايسار شەرىمنىڭ ايتۋىنشا، سوت ءبىر ايدان استام ۋاقىتتان كەيىن بولادى. ەگەر اماناتتى وسى قىلمىس بويىنشا ايىپتى دەپ تاپسا، 5 جىلدان 20 جىلعا دەيىن باس بوستاندىعىنان ايىرۋى مۇمكىن.
