تانىمايتىن قىزعا بۇيرەگىن بەرگەن ورالدىق جىگىت: ءبىز ءبىر وتباسىنداي بولىپ كەتتىك
وتا 20 -قازان كۇنى الماتىداعى سىزعانوۆ اتىنداعى ۇلتتىق حيرۋرگيا ورتالىعىندا جاسالدى. قايىرىمدى جىگىت ءجاميلا بايسەرىكوۆا تۋرالى تەلەارنادان كورگەن.
ءجاميلا مەن ابزال تاعدىردىڭ جازۋىمەن تانىسىپ، 3 اي بويى مۇڭ-مۇقتاجىن ءبولىسىپ، ءبىر وتباسىداي بولىپ كەتتى. 25 جاستاعى ءجاميلانىڭ قوس بۇيرەگى 2014 -جىلدىڭ جەلتوقسانىندا قاتار ىستەن شىققان. سودان بەرى بويجەتكەن اپتاسىنا 3 رەت 4 ساعاتتان گەمودياليز اپپاراتىنا تاڭىلىپ ءجۇردى. وتباسى گەمودياليز اپپاراتىنا جاقىن بولۋ ءۇشىن شىمكەنتتە پاتەر جالداپ تۇرۋعا ءماجبۇر بولعان.
اناسى قۇرمانگۇل قالمىرزايەۆا قازاقپارات تىلشىسىنە 3 جىل ىشىندە قانداي قيىندىق كەشكەنىن ايتىپ بەردى.
« قىزىمنىڭ قان قىسىمى 220 دان تۇسپەي قويدى. ءبىر كۇندە 3 رەت جەدەل جاردەم شاقىرعان كەز بولعان. دارىگەرلەر بۇيرەك اۋىستىرسا، ءۇمىت بار دەگەن سوڭ بارلىق تەلەارنالاردان كومەك سۇراي باستادىم. دونور تابىلمادى. بۇيرەك بەرەم دەگەن اعايىننىڭ قان توبى، تاعى ءبىر ماسەلەسى سايكەس كەلمەدى. سونداي قيىن ساتتەردى باسىمىزدان كەشىرىپ جاتتىق»، - دەدى اناسى قۇرمانگۇل.
تەلەارناداعى سيۋجەتتەن سوڭ قازاقستاننىڭ تۇكپىر-تۇكپىرىنەن ءجاميلاعا قول ۇشىن سوزعان ازاماتتار كوبەيگەن.
گەمودياليز كابينەتى اراسىندا شاپقىلاپ جۇرگەندە قۇرمانگۇلگە الماتى قايىرىمدىلىق قورىنان ادامدار حابارلاسقان.
«شىراعىم، 300000 ءتۇسىپ تۇر. 20000 سالا سالساڭ، الاسىڭ، ميلليون ءتۇسىپ تۇر، 40000 سالا سالساڭ، دەمدە شەشىپ الاسىڭ دەپ حابارلاستى. ءسىز كىمسىز دەسەم، «مەنىڭ دە سەن سياقتى پەرزەنتتەرىم بار. سەنى الدايتىن ادام ەمەسپىن» دەپ سەندىردى عوي. گەمودياليز كابينەتىندە وتىرىپ، جۇگىرىپ بارىپ سۇراعان اقشاسىن سالىپ جۇردىك. ەندى قايتەمىن؟ قولدايتىن ادام بولمادى. جىعىلعانعا جۇدىرىق دەگەندەي ادامدار الداپ تا كەتتى. جاپادان جالعىز ءجۇر ەدىم، مىنا ابزال كەلگەلى كوزىمىز اشىلدى»، - دەدى اناسى.
وتباسى ءۇشىن ءومىر مەن ءولىم اراسىندا ارپالىسقان كۇندەر تاعى باستالدى. ءجاميلا مەن ابزال شىمكەنتتە تەكسەرىلۋدى باستادى.
«قان توبى، تالداۋلارى سايكەس كەلسە ەكەن دەپ اللاعا قايتا-قايتا سىيىندىم. كەيىن الماتىعا كەلگەندە ترانسپلانتاتسيا ءۇشىن نوتاريۋسپەن قۇجات بەكىتۋ كەرەك بولدى. بۇيرەك بەرەتىن اداممەن تۋىستىق قاتىناسىڭدى راستاۋ كەرەك دەدى. مەن قىزىمنىڭ ءومىرى ءۇشىن ابزالدى اپكەمنىڭ بالاسى دەپ وتىرىك ايتۋىما تۋرا كەلدى. نوتاريۋس قۇجات سۇرادى. كەيىن ونىڭ تۋىس ەمەس ەكەنى انىقتالعان كەزدە مەن نوتاريۋس الدىندا وتىرىپ جىلادىم. اينالايىن، ءبىر ادام تەگىن بۇيرەگىن بەرەمىن دەپ تۇرسا، مەن قالايشا قىزىمنىڭ ءومىرى ءۇشىن وتىرىك ايتپايمىن. ءسويتىپ باسقا زاڭگەرلەردىڭ كومەگىنە جۇگىنە وتىرىپ، ايتەۋىر شەشىمىن تاپتىق. ەندى بۇيرەك اۋىستىرادى دەپ جۇرگەندە، ءجاميلانىڭ وكپەسىنەن سۋ الۋ كەرەك بولىپ، تاعى پىشاققا تۇسۋگە تۋرا كەلدى. ونىڭ تالداۋىن تەكسەردى. ابدەن ۇيقىم قاشتى. تالداۋى جاقسى بولىپ شىقتى. ەرتەسىندە دارىگەر كەلىپ وكپەسىنىڭ ءبىر بولشەگىن كەسىپ الىپ تالداۋ جاسايمىز دەدى. ءوزى ارەڭ جۇرگەن قىز، ەندى ونىڭ وكپەسىن كەسىپ السا نە بولماق دەپ تاعى قايعىعا باتتىم. اراسىندا ءجاميلا دا، ابزال دا اۋىردى»، - دەدى اناسى.
ءسويتىپ اراعا 3 اي سالىپ، 20 -قازاندا كوپتەن كۇتكەن وتا جاسالدى. وتادان سوڭ ابزال 3 -كۇنى اۋرۋحانادان شىعىپ كەتتى. ال ءجاميلا ءالى دارىگەرلەردىڭ قاتاڭ باقىلاۋىندا. قازىر ول گەمودياليزگە بارىپ جۇرگەن جوق. تاماق ءىشىپ، اقىرىن وزدىگىنەن قوزعالىپ ءجۇر. قىزىنىڭ بەتىنە كۇلكى جۇگىرگەنىن كورگەن انا دا باقىتتى.
باتىس قازاقستان وبلىسى، اقجايىق اۋدانى، المالى اۋىلىنىڭ تۋماسى ابزال ادىلوۆپەن تىلدەسۋدىڭ دە ءساتى ءتۇستى.
- ءجاميلانى قايدان تاۋىپ الدىڭىز؟
- 2016 -جىلى «جان جىلۋى» باعدارلاماسىنان بۇيرەككە مۇقتاج قىزىلوردالىق جانار دەگەن قىزدى كورىپ، وعان كومەكتەسكىم كەلگەن. جاناردىڭ تەلەفونىن الىپ سويلەسىپ ءجۇردىم. كەيىن وعان كۇيەۋى بۇيرەك بەرەتىن بولعان سوڭ، جاعدايى ودان دا قيىن ءجاميلاعا كومەك بەرەمىن دەپ شەشتىم. وسىلايشا، جاميلامەن سويلەسىپ، قان توبى 3 ەكەنىن ءبىلدىم.
- مۇنداي قادامعا بارۋعا ءسىزدى نە يتەرمەلەدى؟
- جانىم اشىدى. اقشالاي بولسا دا كومەكتەسسەم دەپ تەلەفوندارىن جازىپ العانمىن. ۇيگە كەلگەن سوڭ ويلاندىم. اقشا بەرسەم، ۋاقىتشا پروبلەمالارىن عانا شەشەدى. اللا رازىلىعى ءۇشىن كومەكتەسسەم، قالاي بولادى دەپ شەشىم قابىلدادىم.
- اتا-اناڭىز قارسى بولمادى ما؟ وتباسىندا نەشە بالاسىزدار؟
- اتا-اناما ەسكەرتتىم. باسىندا ولار قارسى بولدى. 2 ايداي ۋاقىت وتكەن سوڭ ولار كەلىستى. وتباسىندا مەن جالعىز بالامىن. سوندىقتان، ولار ۇزاق كەلىسپەي ءجۇردى.
- قانداي قيىندىقتاردى جەڭۋگە تۋرا كەلدى؟
- 2 ايداي اۋرۋحانانىڭ تابالدىرىعىن توزدىردىق. تالداۋلار ناتيجەسىن ۇزاق كۇتۋگە تۋرا كەلدى. مەن قانىم 3-توپ، سايكەس كەلەدى دەپ ويلاپپىن. ءبىراق بۇل جەردە قان توبى عانا ەمەس، بۇيرەكتىڭ تامىرلارى دا سايكەسۋى ءتيىس ەكەن. بارلىعى بولدى دەي بەرگەندە زاڭ تۇرعىسىنان پروبلەمالار كەس-كەستەي بەردى. تۋىسقانى بولماسا، باسقا ادامنىڭ دونور بولۋى قيىن ەكەن. مەن ۋاقىتشا قاعاز جۇزىندە ۇيلەنەيىك دەگەن ۇسىنىس ايتتىم. وپەراتسيا وتكەن سوڭ اجىراسامىز دەدىم. ەندى بارلىق اناليز سايكەسىپ تۇرعان سوڭ تىعىرىقتان شىعاتىن جول تابۋ كەرەك قوي... ءجاميلانىڭ قايتا-قايتا قان قىسىمى كوتەرىلدى. وكپەسىنەن سۋ الدى، «تكان» الدى. ايتەۋىر بىلىكتى زاڭگەرلەر زاڭنامادان كامەلەتتىك جاسقا تولعان، ءوز ەركىمەن بەرەم دەپ تۇرعان ادام دونور بولا الادى دەگەن باپتى تاۋىپ، ماسەلە شەشىلدى.
- ءجاميلانىڭ ورنىندا كىم بولسا دا شەشىمىڭىزدى وزگەرتپەيتىن بە ەدىڭىز؟
- قازاقستاننىڭ كەز-كەلگەن ازاماتىنا ءومىر سىيلاپ، ءۇمىتىن جالعاسام دەگەن وي بولدى. ەر بولسىن، ايەل بولسىن بۇيرەگىمدى بەرەر ەدىم.
- وتا قالاي ءوتتى؟
- وتا 5 ساعاتقا سوزىلدى. مەنەن بۇيرەك الۋعا - 2 ساعات، ءجاميلاعا سالۋعا 3 ساعات كەتتى. مەن ويانعان كەزدە ءجاميلا دا وياۋ ەكەن. جۇما جاسالدى، دۇيسەنبى شىقتىم. 3-4 اي قاتار جۇردىك. ءبىر وتباسىنداي بولىپ كەتتىك. بولاشاقتا دا اعالى-قارىنداس رەتىندە ارالاسىپ تۇرامىز.
اۆتور: گۇلميرا عۇسمان-ءالي
