ۇلتتىق بانك باسشىلىعى دەپۋتاتتىڭ سۇراعىنا قازاقشا جاۋاپ بەرە المادى
بۇگىن ماجىلىستە كەيبىر زاڭنامالىق اكتىلەرگە ساقتاندىرۋ جانە ساقتاندىرۋ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى تانىستىرىلدى. قۇجاتتى تالقىلاۋ بارىسىندا دەپۋتات باقىتگۇل حامەنوۆا بايانداماشىعا سۇراعىن قازاق تىلىندە قويدى. «مەنىڭ ساۋالىم قازاقشا بولادى. بارىنە دە قازاق ءتىلى تۇسىنىكتى، سوندىقتان قازاقشا جاۋاپ بەرۋىڭىزدى سۇرايمىن»، - دەدى ءسوزىنىڭ باسىندا دەپۋتات.
«اتى دارداي زاڭ جوباسى، ءسوز جوق. مىناۋ ادىمداپ بارا جاتقان زاماندا بۇل زاڭ جوباسى كەرەك-اق. ءبىراق وسى زاڭ قالاي ورىندالىپ جاتىر؟ وسى كۇنگە دەيىن ورىندالۋى قالاي بولدى؟ سوعان باقىلاۋ جۇرگىزىپ كەلەسىزدەر مە؟ اۋىلدان كەلگەن قاراكوز باۋىرلارىمىزدىڭ قۇرىلىس كومپانيالارىندا، قالا بەردى قارا جۇمىستا ءجۇرىپ، تالاي ارانداپ قالىپ جاتقانى جاسىرىن ەمەس. وقىس وقيعالاردىڭ كەسىرىنەن ولاردىڭ دەنساۋلىعىنا زيان كەلگەندىگىنە ءسىز دە، ءبىز دە كۋامىز. ءبىراق ەشقانداي ساقتاندىرۋ بولىپ جاتقان جوق»، - دەدى حامەنوۆا.
بۇدان بولەك، دەپۋتاتتى ومبۋدسمەن ينستيتۋتىنىڭ جۇمىسى قىزىقتىردى.
«زاڭ جوباسىندا ومبۋدسمەن ءۇش جىلعا سايلانادى، ءبىراق ەكى رەتتەن كوپ ەمەس دەپ تۇر. ونى كىم سايلايدى؟ سەگىز جىلدىڭ ىشىندە ەكى مىڭعا جۋىق ىستەردى شەشۋگە قاتىسى بولدى دەدىڭىز. سول ومبۋدسمەننىڭ(ادام قۇقىقتارى جونىندەگى ۇيىم - رەد.) جۇمىسىنا كەڭىرەك تۇسىنىك بەرسەڭىز»، - دەگەن دەپۋتات ساقتاندىرۋ كومپانيالارىنا باقىلاۋ قالاي جۇرگىزىلەتىنىن سۇرادى.
ال بايانداماشى - ۇلتتىق بانك ءتوراعاسىنىڭ ورىنباسارى جانات قۇرمانوۆ دەپۋتاتتىڭ ءوتىنىشىن ورىنداي المايتىنىن ايتتى. «ءتۇسىندىم، راحمەت سۇراقتارىڭىزعا. كەشىرىڭىز، مەن ورىسشا جاۋاپ بەرەمىن. ويتكەنى تەرمينولوگيا بويىنشا كەيدە ءسوزىم جەتپەي قالادى. سوندىقتان ورىسشا جاۋاپ بەرەمىن»، - دەگەن ول ورىسشا سويلەپ كەتتى.
«ومبۋدسمەن بويىنشا كوپ سۇراق تۋىندايدى. بۇل اتالمىش ينستيۋتتىڭ ەلىمىزدە ەندى قالىپتاسىپ كەلە جاتقانىنا بايلانىستى. 2008 -جىلدان باستاپ جۇمىس ىستەپ كەلەدى. ءبىراق ول كولىك يەسىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ بويىنشا عانا جۇمىس ىستەيدى. بۇگىنگى كۇنى ومبۋدسمەن قىزمەتىنىڭ وڭ ناتيجەسى بار، سوندىقتان ونىڭ قىزمەت اياسىن كەڭەيتۋدى جوسپارلاپ وتىرمىز. بۇل سوتقا دەيىن كوپتەگەن ماسەلەنى شەشۋگە مۇمكىندىك بەرەدى. شىن مانىندە، ومبۋدسمەندەردى ساقتاندىرۋ كومپانيالارى سايلايدى. ءبىزدىڭ ويىمىزشا، نارىق تەتىگىنىڭ زاڭى وسى، ياعني نارىق قاتىسۋشىلارى داۋلاردى سوتقا دەيىن شەشەتىن كاسىبي قاتىسۋشىنى انىقتايدى. ونى ساقتاندىرۋ كومپانيالارىنىڭ كەڭەسى سايلايدى. بۇل كەڭەستە ۇلتتى بانكتىڭ وكىلدەرى بار. ءبىز بارلىق سۇراقتاردى مۇددەلەر قاقتىعىسىنا جول بەرمەۋ ءۇشىن ەگجەي- تەگجەي قارايمىز»، - دەدى ۇلتتىق بانك ءتوراعاسىنىڭ ورىنباسارى.
ونىڭ ايتۋىنشا، قازىر ساقتاندىرۋ نارىعىنىڭ الەۋەتى قازاقستاندا تولىق ىسكە اسىرىلماي كەلە جاتىر. بۇل رەتتە ساقتاندىرۋ كومپانيالارىنىڭ قىزمەتىن رەتتەۋدى كۇشەيتۋ قاجەت.
«نەگە؟ ويتكەنى 2020 -جىلدان باستاپ قازاقستان دۇنيەجۇزىلىك ساۋدا ۇيىمىنا قوسىلادى. ەلدە ساقتاندىرۋ كومپانيالارىنىڭ شەتەلدىك فيليالدارى اشىلۋى مۇمكىن. بۇل ورايدا ءبىزدىڭ ساقتاندىرۋ كومپانيالارىمىز ەكونوميكانىڭ تالابىنا جاۋاپ بەرمەسە، ۇلتتىق ساقتاندىرۋ نارىعىنىڭ باسەكەگە قابىلەتتىلىك ماسەلەسى تۋىندايدى»، - دەدى ول.
Stan.kz
