قازاقستاندىق حيرۋرگتەر ناۋقاستىڭ ءتىلىن اۋىستىرىپ، ەرەكشە وتا جاسادى
بۇل تۋرالى حابار 24 حابارلايدى.
ەرەكشە وتا 60 جاستاعى قارياعا جاسالعان. قاتەرلى ىسىك سالدارىنان قاريا ءتىلىنىڭ ءبىر بولىگى الىپ تاستالعان. ەندى دارىگەرلەر ناۋقاستىڭ بىلەگىنەن جاڭا ءتىل جاساپ بەردى.
كۇردەلى وتا سەگىز ساعاتقا سوزىلعان. ناۋقاستىڭ ءتىلىن بىلەگىنىڭ ەتىمەن اۋىستىرعان. ادامنىڭ شاشىنان دا جۇقا قان تامىرلارعا 10 عا جۋىق تىگىس تىككەن.
«وسىلايشا قالىپتاسقان، ءوز قىزمەتىن اتقارا الاتىن ءتىل جاسادىق. ول الداعى ۋاقىتتا ناۋقاسقا جۇتىنۋعا، تاماقتانۋعا، سويلەۋگە مۇمكىندىك بەرەدى. جىل سايىن ونكولوگيا جانە راديوبيولوگيا ينستيتۋتىندا وسى تارىزدەس 30 شاقتى وتا جاسالادى»، - دەيدى ونكولوگيا جانە راديوبيولوگيا عىلىمي- زەرتتەۋ ينستيتۋتىنىڭ عىلىم ءبولىمىنىڭ ديرەكتورى داۋرەن ءادىلباي.
دارىگەردىڭ ايتۋىنشا، اۋىز قۋىسىنىڭ قاتەرلى ىسىگى كوبىنە شىلىم مەن ىشىمدىككە اۋەس جانداردا كەزدەسەدى ەكەن. وتادان كەيىن ناۋقاستارعا ارنايى پروتەز سالىنادى.
