دۇنيەجۇزىلىك ساۋدا ۇيىمى قىرعىزستاننىڭ قازاقستان جايلى شاعىمىن قارادى

قىرعىز ۇكىمەتىنىڭ حابارلاۋىنشا، بىشكەك دەلەگاتسياسى جيىنعا قاتىسۋشىلاردى شەكاراداعى وتكىزۋ بەكەتتەرىندە قالىپتاسقان جاعدايدان حاباردار ەتكەن. قىرعىزستان قازاقستان تارابى جۇك تاسىمالداۋشىلارعا شەكارادا كەدەرگىنى «قولدان جاساپ وتىر» دەپ سانايدى.

«دەلەگاتسيا د س ۇ- نىڭ نەگىزگى پرينتسيپتەرىن، ماسەلەن، بارىنشا قولايلى جاعداي جاساۋ رەجيمىن، اشىقتىقتى قامتاماسىز ەتۋ تۋرالى ەرەجەنى، سونىمەن بىرگە ترانزيت ەركىندىگى مەن كەمسىتپەۋشىلىك تۋرالى قاعيداتتاردى قازاقستاننىڭ بۇزىپ وتىرعانىن اتاپ كورسەتتى» دەپ حابارلايدى قىرعىزستان ۇكىمەتى.

جەنيەۆاداعى وتىرىستا قىرعىزستان دەلەگاتسياسى شەكارادا جۇك كولىكتەرىنىڭ قاڭتارىلىپ تۇرۋعا ءماجبۇر بولعان ۋاقىتىن، كولىك قۇرالدارىنىڭ ۇزىن- سونار كەزەگىن، سونىمەن بىرگە، حالىقارالىق ۆاليۋتا قورىنىڭ مالىمدەمەسىنە سايكەس، قازىرگى كەزگە دەيىن 200 ميلليون دوللاردان اسىپ وتىرعان ەكونوميكالىق شىعىن كولەمىن كورسەتەتىن ناقتى سيفرلار كەلتىرگەن. بولجام بويىنشا، شىعىن سالدارىنان قىرعىزستان ەكونوميكاسىنىڭ دامۋ كورسەتكىشى 0,3 پايىزعا تومەندەيدى. سونىمەن بىرگە جيىندا قازاقستان تەك قىرعىزستاننان شىققان نەمەسە قىرعىزستانعا كىرەتىن جۇكتەرگە عانا قاتىستى الگىندەي ءىس- شارالارىن ماقساتتى تۇردە قولدانىپ وتىر دەپ مالىمدەگەن بىشكەك دەلەگاتسياسى.

قازاقستان دەلەگاتسياسى بولسا بۇعان دەيىن ايماقتىق ۇيىمداردا بىرنەشە مارتە مالىمدەگەن ۇستانىمىن تاعى قايتالاپ، شەكارادا تەكسەرۋدىڭ كۇشەيتىلگەنىن «كونتراباندا» جانە «زاڭسىز تاۋار تاسىمالىنا» قارسى كۇرەس قاجەتتىگىمەن، سانيتارلىق جانە فيتوسانيتارلىق باقىلاۋ تالاپتارىمەن ءتۇسىندىردى دەپ حابارلايدى قىرعىزستان ۇكىمەتى.

قازاقستان ۇكىمەتىنىڭ رەسمي سايتىندا جەنيەۆاداعى جيىنعا قازاقستان دەلەگاتسياسىنىڭ قاتىسقانى جايلى اقپارات جوق.

قىرعىزستان دەلەگاتسياسى قازاقستان تارابى كەلتىرگەن دالەلدەردىڭ ءارقايسىسىنا جاۋاپ بەرىپ، د س ۇ- نا مۇشە مەملەكەتتەردى قالىپتاسقان جاعدايعا وبەكتيۆتى باعا بەرۋگە، ال قازاقستاندى د س ۇ اياسىندا العان مىندەتتەمەلەرىن مۇلتىكسىز ورىنداۋعا شاقىرعان.

جەنيەۆاداعى جيىندا وڭتۇستىك كورەيا، جاپونيا جانە مولدوۆا دەلەگاتسيالارى شەكاراداعى احۋالدى ەكىجاقتى كەڭەسۋلەر ارقىلى تەزىرەك رەتكە كەلتىرۋگە شاقىرعان.

قازاقستاننىڭ 10 - قازاننان باستاپ قىرعىزستانمەن شەكاراسىنداعى باقىلاۋدى كۇشەيتكەننەن كەيىن باقىلاۋ- وتكىزۋ بەكەتتەرىندە بىرنەشە شاقىرىمعا سوزىلعان ۇزىن- سونار كەزەك پايدا بولعان. اسىرەسە تەز بۇزىلاتىن ونىمدەر تيەگەن ۇلكەن جۇك كولىكتەرىنىڭ جۇرگىزۋشىلەرى بۇل شارانىڭ كەسىرىنەن قاتتى زارداپ شەككەنى تۋرالى شاعىمدانعان.

azattyq.org

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى