تۇركىستاندا ساۋلەتشىلەر باس قوستى
دەپ حابارلايدى قازاقپارات ءتىلشىسى.
باسقوسۋدى تۇرىكسوي حالىقارالىق ۇيىمى، تۇركى الەمى ينجەنەرلەر مەن ساۋلەتشىلەر وداعى جانە ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتى بىرلەسىپ ۇيىمداستىردى.
«تۇركى الەمىنىڭ مادەني استاناسى» مارتەبەسىن العان تۇركىستان قالاسىن قولداۋ ماقساتىندا ۇيىمداستىرىلعان بۇل شاراعا تۇركيادان 40-تان استام دەلەگات قاتىسىپ، قاسيەتتى قالانىڭ بولاشاق دامۋىنا بايلانىستى ءوز پىكىرلەرىن ورتاعا سالدى. سونداي- اق، جيىنعا تۇرىكسوي، تۇرىكپا، تۇركى اكادەمياسى سەكىلدى تۇركىتىلدەس حالىقتاردىڭ ورتاق ينتەگراتسيالىق حالىقارالىق ۇيىمدارىنىڭ وكىلدەرى كەلدى.
ايتا كەتەيىك، «شەحرەنگيز» ءسوزى ورتاعاسىردا تۇركى مۇسىلمان جۇرتىندا، وتىرىقشى حالىقتاردا قولدانىلىپ، كەيىن ۇمىت بولعان. قازىرگى تىلمەن ايتقاندا «قالا كۇنى» ۇعىمىنا جاقىن ماعىنا بەرەتىن ءسوز. ورتاعاسىرلىق مۇسىلمان ەلدەرىنىڭ قالالارىندا ارنايى ءبىر كۇندى وسىلاي اتاپ، سول كۇنى قالانىڭ بولاشاق دامۋىنا، ساۋلەت نىساندارىنا قاتىستى ماجىلىستەر وتكىزىلگەن. جيىن سوڭى ءمۇشايرالارعا، ءتۇرلى ونەر سايىستارىنا ۇلاساتىن بولعان. بىرنەشە جىلدان بەرى تۇركياداعى تۇركى الەمىنىڭ ينجەنەرلەر مەن ساۋلەتشىلەر وداعى وسى ءداستۇردى قايتا جانداندىرۋعا كۇش سالۋدا. «قاشعاردان اندالۋسياعا دەيىنگى تۇركى مۇسىلمان قالالارى» اتتى بۇل مەگا- جوبا اياسىندا بۇعان دەيىن دە الەمنىڭ بىرنەشە قالاسىندا ءدال وسىنداي شارالار وتكىزىلگەن بولاتىن.
جيىن بارىسىندا ءسوز العان تۇركى الەمى ينجەنەرلەر مەن ساۋلەتشىلەر وداعىنىڭ باس حاتشىسى يلياس دەميردجي تۇركيالىق ساۋلەتشىلەر تۇركىستان قالاسىنىڭ دامۋىنا قاتىستى كەز- كەلگەن ساۋلەت- قۇرىلىس جوبالارىنىڭ ازىرلەنۋى مەن قۇرىلىس جۇمىستارىنىڭ جۇرگىزىلۋىنە قولدان كەلەر كومەكتەرىن بەرۋگە دايىن ەكەندىكتەرىن جەتكىزدى.
«ءتىپتى، ناقتى ۇسىنىستار بولسا، ينۆەستورلاردى تارتۋعا دا مۇددەلىمىز دەپ اتاپ ءوتتى»، - ول.
اۆتور: اينۇر اقبايەۆا
