قازاقستاندىق ديزاينەرلەر پاريجدەگى ءسان اپتالىعىنا بارادى
فرانسيا استاناسىنا قازاقستاندىق شەبەرلەر ماسكەۋدەگى Mercedes-Benz Fashion Week Russia ءسان اپتالىعىندا كورسەتكەن كيىم ۇلگلەرىمەن بارادى. ونىڭ ۇجىمدىق كورسەتىلىمى ق ر پرەزيدەنتىنىڭ «رۋحاني جاڭعىرۋ» مەملەكەتتىك باعدارلاماسىنىڭ اياسىندا ۇيىمداستىرىلدى. «پرەزيدەنت ۇلتتىق مادەنيەتىمىز بەن ونەرىمىزدى سازگەرلەردىڭ، جازۋشىلاردىڭ، سۋرەتشىلەردىڭ تۋىندىلارى ارقىلى تانىتۋ قاجەتتىگىن ايتادى. ديزاينەرلەر دە وسى توپقا جاتادى دەپ ويلايمىن، ويتكەنى ولار دا شىعارماشىلىقتىڭ ادامى. 10 جىلدان استام ۋاقىتتان بەرى ديزاينەرلەر وسى سالادا جۇمىس ىستەپ، ونى ەلدەگى تانىمال سالالاردىڭ بىرىنە اينالدىردى» ، -
دەيدى دينارا ءساتجان.
ول ماسكەۋدە ءوزىنىڭ كيىمدەر جەلىسىن ۇسىنعان 4 ديزاينەردىڭ ءبىرى بولدى. ونىڭ ايتۋىنشا، كورسەتىلىم كۇندىزگى ۇشتە بولسا دا، ونى كورۋگە 1000 نان استام ادام كەلگەن. «قازاق مودەلەرلەرىنىڭ Mercedes-Benz Fashion Week Russia عا قاتىسۋى كورشىلەرىمىزدىڭ جاڭا قىرلارىن اشتى» ، - دەپ جازادى «دني. رۋ» ينتەرنەت باسىلىمى.
«ءبىزدىڭ كوللەكتسيامىزدىڭ كورەرمەندەرگە ۇناعان سەبەبى، مەنىڭشە، وندا ءبىزدىڭ ءتول ۇلتتىق ەرەكشەلىكتەرىمىزدىڭ كورىنىس تابۋىندا جاتىر. مەن ءوز كوللەكتسيامدى قازاق جانە ورىس مادەنيەتىن ساباقتاستىرعان ءانشى روزا باعلانوۆانىڭ 95 -جىلدىعىنا ارنادىم. Mercedes-Benz Fashion Week باسشىسى ءوز ءسان اپتالىعىن ءبىزدىڭ كوللەكتسيامىزبەن اشپاعانىنا وكىنىپ تە قالدى» ، - دەيدى د. ءساتجان. ەندى ديزاينەرلەر پاريجگە دايىندالىپ جاتىر. شارادا 70 كە جۋىق كيىم ۇلگىسى كورسەتىلەتىنى جوسپارلانعان. پاريج ءسان اپتالىعىندا دا ۇلتتىق ءتول ەرەكشەلىكتەردىڭ كورىنىس تابۋىنا كوڭىل بولىنەدى.
