ايەل زاتى نە قالايدى؟
ولارعا بارىنەن بۇرىن ەر ادامنىڭ نازارى قاجەت. مۇنى كوشەدەگى سۇقتانعان جانارلارمەن شاتاستىرماڭىز. تەك ءوز ەر ازاماتىنىڭ كوڭىل ءبولۋىن قاجەت ەتەدى. بۇگىن جىلۋدى سىرتتان ىزدەسە، كەشە ءسىزدىڭ سەزىمىڭىزگە بولەنە المادى دەگەن ءسوز. جۇمىسىڭىز باسىڭىزدان اسادى. كۇندىز- ءتۇنى دامىل تاپپاي ەڭبەك ەتىپ ءجۇرسىز. ءبىراز جەتىستىككە دە جەتىپ ۇلگەردىڭىز. ءالى دە بيىككە كوتەرىلۋ ءۇشىن تىنباي تەر توگۋگە تۋرا كەلەدى. سولاي ما؟ دەمەك، بۇگىنمەن ەمەس، ەرتەڭمەن ءومىر سۇرەسىز، اقىلىڭىز تولىسقان. ولاي بولسا، ءبىر ءسات ويلاپ كورىڭىزشى. ەشكىم جەتپەگەن مانساپ، ارناسىنا سىيماي اعىلىپ جاتقان اقشا - مۇنىڭ ءبارى نە ءۇشىن قاجەت؟ نەسىنە سونشا تىراشتانىپ ءجۇرسىز؟ ءوزىڭىز قالاعان شىڭعا شىققان كەزدە سوقا باسىڭىز سوپايىپ جالعىز قالعىڭىز كەلە مە؟ جالعىزدىقتا بايلىق پەن بيلىك جانىڭىزدى باقىتقا بولەي الا ما؟ جاۋابىڭىز «جوق» بولسا، وزگەرتۋ ءوز قولىڭىزدا، بارلىعىن ءبىر كۇندە 180 گرادۋسقا بۇرىپ جىبەرە المايسىز. نەدەن باستاۋ كەرەك؟ جارىڭىز نە قالايدى؟ قانداي ءوتىنىشىن ەلەۋسىز قالدىردىڭىز؟ ەسىڭىزگە ءتۇسىرىپ، مۇمكىندىك بولسا، ءتىزىم جاساڭىز.
- بىرگە كينو كورۋ (مىندەتتى تۇردە كينوتەاتردان ەمەس) ؛
- كەشكىلىك سەرۋەنگە شىعۋ؛
- ايىنا ءبىر رەت تابيعات اياسىندا دەمالۋ (بىردە بالالارمەن، بىردە وڭاشا) ؛
- كەيدە كافەدەن تاماقتانۋ، كەيدە تەز دايىندالاتىن تاعامدار (فاست فۋد) ورتالىعىنا بارۋ؛
- كەشكىسىن نە كورىپ، نە قويعانىن سۇراپ، ارماندارىمەن، يدەيالارىمەن، وي- سەزىمىمەن ءبولىسۋ؛
- ءارتۇرلى ويىندار ويناۋ؛
- باسسەينگە جازىلۋ؛
- بي كەشىنە بارۋ؛
ايەل ادامنىڭ قيالى شەكسىز، جالعاسا بەرەدى. قالاساڭىز، ءوز قيالىڭىزدى قوسىپ، جوسپار قۇرىڭىز. «دايىن» باعىتتى بەتكە الىپ، تىم قۇرىعاندا ايىنا ەكەۋىن ورىنداۋعا ۋاقىت تابىڭىز. ىستەۋ قاجەت بولعاندىقتان، مىندەت رەتىندە ەمەس، ءوزىڭىز شىن نيەتپەن ۋاقىت ارناڭىز. ۇيگە كەلگەندە اڭگىمەسىن تىڭداپ وتىرمىن دەپ، ءبىر كوزىڭىز تەلەديداردا نە تەلەفوندا بولسا، بۇل وعان ۋاقىت بولگەن بولىپ سانالمايدى. مۇندايدا جاي عانا جانىندا وتىراسىز، بىرگە ەمەسسىز. ودان كەيىن مىندەت بولعاندىقتان، وتباسىن اسىراۋ ءۇشىن تاپقان اقشاڭىزدىڭ، جاساعان سىيلىقتارىڭىزدىڭ، ايتقان ادەمى دە قۇرعاق سوزدەرىڭىزدىڭ قۇنى ءبىر تيىن بولادى. ايەل ادامعا مۇنىڭ بارلىعىنان بۇرىن جاي عانا بىرگە بولعانىڭىز، شىن نيەتپەن نازار اۋدارعانىڭىز قاجەت. نە ىستەيتىندەرىڭىز ماڭىزدى ەمەس، باستىسى شىنىندا دا بار كوڭىلىڭىزبەن جانىندا ەكەنىن سەزىندىرۋىڭىز كەرەك. سوندا ول دا ءسىزدى ارى قاراي جەتىستىككە تالپىندىرىپ، جىگەرلەندىرىپ، قولداپ وتىرادى.
Massaget.kz
