قازاقستاندىقتار وزدەرىنە قاتىستى قۇپيا تەرگەۋ امالدارىنا شاعىم تۇسىرە الادى
بۇل تۋرالى بۇگىن بۋرابايدا وتكەن «قازاقستانداعى قىلمىستىق پروتسەسس: جاڭعىرۋ جولدارى» كونفەرەنتسياسىندا ق ر باس پروكۋرورىنىڭ ورىنباسارى مارات احمەتجانوۆ مالىمدەدى.
ەسكە سالا كەتسەك، قر قۇقىق قورعاۋ قىزمەتى نەگىزدەرىن جاڭعىرتۋ تۋرالى جاڭا زاڭ جوباسىنا سايكەس، كۋالاندىرۋ كەپىلى، ۇلگىلەردى الۋ جانە قۇپيا تەرگەۋ امالدارى جونىندەگى ءۇش سانكسيا پروكۋراتۋرا ورگاندارىنان سوتقا وتەدى.
«تەرگەۋ ورگاندارى قۇپيا تەرگەۋ امالدارى جۇرگىزىلگەنى تۋرالى ازاماتتارعا حابار بەرۋگە مىندەتتەلەدى. وزدەرىن اڭدۋدى جانە قوڭىراۋلارىنىڭ تىڭدالۋىن نەگىزسىز دەپ ەسەپتەگەن ازاماتتار سوتقا جۇگىنە الادى. بۇل وتە ماڭىزدى جاڭالىق، مۇنداي قۇقىقتار ءبىزدىڭ ازاماتتاردا بۇرىن- سوڭدى بولماعان. جاڭا زاڭ جوباسى ارقىلى ادامنىڭ كونستيتۋتسيالىق قۇقىقتارىن قورعاۋدى ارتتىرۋدامىز»، - دەدى م. احمەتجانوۆ ق ر قۇقىق قورعاۋ قىزمەتى نەگىزدەرىن جاڭعىرتۋ تۋرالى جاڭا زاڭ جوباسىنىڭ نەگىزگى ەرەجەلەرىن تانىستىرۋ بارىسىندا.
سونداي- اق م. احمەتجانوۆتىڭ ايتۋىنشا، بۇل ەرەجە قۇپيا تەرگەۋ امالدارىن تاعايىندايتىن سوت پەن تەرگەۋ جۇمىستارىنىڭ زاڭدىلىعىن قاداعالايتىن پروكۋروردىڭ جاۋاپكەرشىلىكتەرىن ارتتىرا تۇسپەك. «ەندى سوتتار دا قۇپيا تەرگەۋ امالدارىن تاعايىنداۋعا اسقان جاۋاپكەرشىلىكپەن قارايتىن بولادى. ال بارلىق تەرگەۋ امالدارىنىڭ زاڭدى بولۋىن قاداعالايتىن پروكۋرور قۇپيا تەرگەۋ امالدارىن جۇرگىزۋدىڭ نەگىزدىلىگىن مۇقيات تەكسەرەدى جانە ونى توقتاتۋ نەمەسە وزگە شارا قابىلداۋ تۋرالى اكتى ەنگىزە الادى»، - دەيدى باس پروكۋراتۋرا وكىلى.
ايتا كەتەيىك، قازان ايىندا ەلباسىنىڭ باستاماسىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىقتىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى پارلامەنتكە ۇسىنىلعان ەدى. وندا پرەزيدەنت ادام قۇقىقتارىن قورعاۋ دەڭگەيىن كوتەرۋ، تاراپتاردىڭ باسەكەلەستىگىن ارتتىرۋ، سوت باقىلاۋىن كەڭەيتۋ، تەرگەۋ راسىمدەرىن جەڭىلدەتۋ جانە تەرگەۋ ورگاندارى، پروكۋراتۋرا جانە سوت اراسىنداعى وكىلەتتىكتەرىن ناقتى ءبولۋ سەكىلدى 5 نەگىزگى باعىتتى انىقتاپ بەردى.
اۆتور: ايجان سەرىكجان قىزى
