استانادا انا تۋرالى تەلەحيكايانىڭ تۇساۋى كەسىلدى

  تۇساۋى «سارى ارقا» و س و- دا كەسىلگەن تەلەحيكايادا الماتى قالاسىنداعى اۋداندىق سوتتاردىڭ بىرىندە سۋديا بولىپ قىزمەت اتقاراتىن رايگۇل مەن ونىڭ ۇلى ارماننىڭ ءومىرى باياندالادى.

 رايگۇل اقىلىنا كوركى ساي بولادى. ءبىراق مىنەزى وتە قاتال بولادى. مىنەزىنىڭ تىك بولىپ قالىپتاسۋىنا جۇمىسى، قۇنداقتاعى سابيىمەن جالعىز قالۋى، قيىندىققا تولى ءومىرى اسەر ەتەدى. باستى كەيىپكەردىڭ ومىرىندە جالعىز ۇلى مەن جۇمىسى عانا بار. سونىمەن قاتار، درامادا ەكو كومەگىمەن ەكى بالانىڭ دۇنيەگە كەلۋى، رايگۇلگە جاسالعان قۇيتىرقى ارەكەتتەر مەن الاياقتىق ارەكەتتەر دە سۋرەتتەلەدى.

 «بيىلعى جاڭا تەلەۆيزيالىق ماۋسىمعا «حابار» اگەنتتىگى كوپتەگەن الەۋمەتتىك تەلەحيكايالاردى دايىنداعان بولاتىن. مۇنىڭ الدىندا قارتتاردىڭ تاعدىرىنا ارنالعان «قاريا» دەگەن تەلەحيكايا كورەرمەنگە جول تارتسا، ايەل دارىگەرلەردىڭ قىزىعى مەن شىعىجىن سۋرەتتتەيتىن «ابزال جان» اتتى تۋىندى كورسەتىلدى. وسىدان ءبىر اپتا بۇرىن عانا زەينەت جاسىنا شىققان كەيىن دە ءومىر بار ەكەنىن دالەلدەيتىن، ەگدە تارتقان ادامداردىڭ ەرەكشە ماحاببات سەزىمىن پاش ەتكەن «مەزگىلسىز ماحاببات» اتتى الەۋمەتتىك سەريالىمىز كورسەتىلە باستاعان بولاتىن. ەندى مىنە، بۇگىن كەزەك «انا جۇرەگى» اتتى وتاندىق مەلودراماعا كەلىپ وتىر. انا دەگەن ۇعىمنىڭ ءار قازاق ءۇشىن، مۇسىلمان ءۇشىن قاستەرى ەرەكشە ەكەنىن بىلەسىزدەر. «جۇماق انانىڭ اياعىنىڭ استىندا» دەگەن قاسيەتتى ءسوز بەكەر ايتىلماعانى تۇسىنىكتى. وسى قاسيەتتى ۇعىمداردى تۋ ەتىپ الىپ، رەجيسسەر سانجار وماروۆ، پروديۋسسەرلەر گۇلنۇر ماماساريپوۆا مەن گۇلبارشىن زايىروۆا بىرىگىپ، جاڭا الەۋمەتتىك درامانىڭ كونسەپتسياسىن بىزگە ۇسىندى»، - «حابار» اگەنتتىگى اق- نىڭ باسقارما ءتورعاسىنىڭ ورىنباسارى رينات كەرتايەۆ.

 ونىڭ ايتۋىنشا، سەريالدىڭ كەيىپكەرلەرى كۇندەلىكتى ومىردەن الىنعان.

«ونىڭ كەيىپكەرلەرى 21 - عاسىرداعى قازاق قوعامىندا ءومىر سۇرەتىن ادامدار. ءبىراق ەندى كينو بولعاننان كەيىن سەريالعا ساي ىڭعايلاۋعا تىرىستىق. دەسە دە، ءبىر بىلەتىن دۇنيە - بۇل وقيعا 2000 - جىلداردىڭ باسىندا قازاقستاندا بولعان. ونىڭ كەيىپكەرلەرى بار. بۇل كۇندە الماتى قالاسىندا تۇرىپ جاتىر. سەريالدى كورىپ وتىرعاندا ءبىر جاعىنان ويلانىپ، قاراپايىم زامانداستاردىڭ ومىرىندەگى ءتۇرلى تۇيتكىلدەردى بايقاپ، وي تۇيۋگە مۇمكىندىك الارسىزدار دەگەن ويدامىز»، - دەيدى كەرتايەۆ.

 باستى رولدەردى لەيلو بەكنازار- حانينگا، ءشارىپ سەرىك، جانەل ماقاجان، ولجاس توعىمبەت، ايزادا ساتىبالديەۆا، زيرۋزا تاسماعامبەتوۆا مەن نۇرسۇلتان ەسجان سومدايدى. كارتينانىڭ رەجيسسەرى - سانجار وماروۆ. «حابار» اگەنتتىگىنىڭ تاپسىرىسىمەن تۇسىرىلگەن تەلەحيكايا 14 -قاراشادان باستاپ سەيسەنبى مەن جۇما ارالىعىندا «حابار» تەلەارناسىندا ساعات 21:30-دا كورسەتىلەدى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى