بوتا اتاۋلارىن بىلەسىز بە؟

ءتورت- تۇلىكتىڭ ىشىندەگى ەڭ شولگە شىدامدىسى تۇيە ەكەنى بەلگىلى. ويسىل قارانى ءپىر تۇتقان تۇيە جانۋارىنىڭ ءوز ەرەكشەلىگى بار. تۇيە قازاقتىڭ كوشىپ- قونۋى مەن قارا شارۋاسى ءۇشىن ەرتەدەن- اق پايدالى كولىك ەكەنى ءمالىم. تۇيە جولسىز ءشول جەرلەردە جۇرەتىن «قارا جەردىڭ الىپ كەمەسى» اتانعان كۇشتى، شولگە شىدامدى، سەنىمدى كولىگىنە اينالعان. تۇيە بالاسى - بوتا. بوتانىڭ دا كوپشىلىك بىلە بەرمەيتىن اتاۋلارى بار. بىلە جۇرەيىك!

ارامزا بوتا. مەزگىلسىز تۋعان بوتا.

 اق كەمىك بوتا. ەنەسىنىڭ ۋىز ءسۇتىن ەمىن- ەركىن ەمىپ وسكەن بوتا.

 قارا كەمىك بوتا. ەنەسىنىڭ ۋىز سۇتىنە جارىپ- تويماعان بوتا.

كۇن قاققان بوتا. شىلدە، تامىز ايلارىندا تۋعان بوتانىڭ ىسسىدا كوپ بايلانىپ، كۇنسىرەۋىن ايتادى.

بۇرالقى بوتا. اداسىپ كەلىپ باسقا تۇيەلەرگە قوسىلعان بوتا.

جاسىق بوتا. تۇيە ءتولىنىڭ شيراپ وڭالماي جۇرگەنى. كوك باقا بوتا. ءار ءتۇرلى جاعدايعا بايلانىستى سەمىرمەي وتە ارىق، جالدانباعان بوتانى ايتادى.

مارقا بوتا. مەزگىلىنەن ءۇش- ءتورت اي بۇرىن بوتالاعان تۇيەنىڭ ءتولى.

ءسۇت بوتا. ەنەسىن ەمىپ جۇرگەن تۇيەنىڭ ءتولى.

تولعان بوتا. ساۋىلىپ جۇرگەن ىنگەننىڭ جاقسى ەتتەنىپ، سەمىرگەن بوتاسى.

 قىزىل شاقا بوتا. تۇيەنىڭ شالا تۋعان ءجۇنسىز جاس ءتولى.

قۇدىرا بوتا. مەرزىمىنەن بۇرىن تۋعان بوتانىڭ كۇزگە سالىم تايلاقتان كىشى، باسقا تۇيە تولىنەن ۇلكەن بولعاندىقتان وسىلاي اتالعان.

 قوس كىندىك بوتا. بۋاز تۇيەنىڭ ۋاقىتىندا بوتالاعان ءتولىنىڭ كىندىگى بىرەۋ بولماي، ەكەۋ بوپ تۋعانى.

قۇتىمسىز بوتا. ەنەسىن ەمىپ قويىپ، ءجوندى ساۋعىزبايتىن، جەتەكتەسەڭ جەتەگىڭە جۇرمەيتىن تىرىسقاق مىنەزدىسى.

مايماق بوتا. اياعىنىڭ بىلەزىك بۋىنى ىشكە ياعني نەمەسە سىرتىنا قاراي اينالىپ (قايقايىپ) تۇرعانى.

 نار بوتا. جالعىز وركەشتى نار تۇيەدەن تۋعان بوتا.

قوسپاق بوتا. ايىر وركەشتى تۇيەنىڭ ىنگەنى ءبىر تۋاردىڭ بۋراسىنا شاعىلىسىپ كەتىپ بارىپ، سودان شىققان بۋدان.

 ۇلەك بوتا. تازا قاندى نار تۇيەنىڭ ۇلەك پەن ارۋانانىڭ شاعىلىسۋىنان تۋعان بوتاسى.

 ايىر بوتا. تازا قاندى ايىر تۇيەنىڭ بۋراسى مەن ىنگەنىنىڭ شاعىلىسۋىنان تۋعان بوتا.

جەتىم بوتا. ەنەسى جوق بوتا.

ءولى جەتىم. ەنەسى ءولىپ قالىپ، باسقا بوتالى تۇيەگە تەلىنبەي قالعان بوتا.

 ءتىرى جەتىم. ۇنەمى جۇمىسقا ءمىنىلىپ جۇرەتىن تۇيەنىڭ ۇيدە قالعان بوتاسى.

كەنجە جەتىم. وتە كەش تۋعان بوتانىڭ ەنەسى ءولىپ نەمەسە قاسقىر جەپ، جەتىم قالۋىن اتايدى.

ارامزا جەتىم. باسقا بۋاز تۇيەلەردەن ءۇش- ءتورت اي بۇرىن قىس ىشىندە بوتالاعاننان كەيىن، ەنەسى ءولىپ ارتىندا ءتىرى قالعان بوتا.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى