شاكىر ابەنوۆتىڭ ەلباسىعا كيگىزگەن شاپانى الماتىعا جەتكىزىلدى
كورمەگە قويىلعان ەكسپوزيتسيالار جاس مەملەكەتىمىزدىڭ قۇرىلۋى مەن تۇڭعىش پرەزيدەنتتىڭ ەڭبەك جولىنان سىر شەرتەدى. كورمە قوناقتارى ءۇشىن زالدا نۇرسۇلتان نازاربايەۆتىڭ جەكە قورىنان الىنعان 800 ەرەكشە ەكسپونات پەن ارحيۆ قۇجاتتارى، فوتولار مەن شەت مەملەكەتتەر تابىس ەتكەن ناگرادالار قويىلعان.
«بۇل جەردە باعا جەتپەس قۇندى ارحيۆ قۇجاتتارى قويىلعان. ەلباسىنىڭ جاس كەزى مەن 30 جاستاعى حرونيكالارىن كورۋگە بولادى. ەلباسىنىڭ بەلسەندى كومسومول كەزىنەن كوشباسشىعا اينالعانعا دەيىنگى ءومىر جولىمەن تانىسۋعا بولادى»، - دەدى ق ر تۇڭعىش پرەزيدەنتى - ەلباسىنىڭ كىتاپحاناسى ديرەكتورىنىڭ ورىنباسارى كۇلايشا اقتايەۆا.
كورمەدەگى قۇندى ەكسپوناتتاردىڭ ءبىرى - بولەك باتىردىڭ دۋلىعاسى. وتباسىلىق قۇندى جادىگەر 2004 - جىلى تۇڭعىش پرەزيدەنت مۇراجايىنا تابىس ەتىلگەن. كورمەگە 1991 -جىلى العاشقى يناۋگۋراتسيا كەزىندە ەل اقساقالى شاكىر ابەنوۆ ەلباسىنا باتاسىن بەرىپ، يىعىنا جاپقان شاپان قويىلعان. ەلباسىعا تابىس ەتىلگەن حالىقارالىق ناگرادالار دا كورمە تورىنەن ورىن العان. كورمەنىڭ اشىلۋىندا ءسوز سويلەگەن الماتى اكىمى باۋىرجان بايبەك ەلباسى باسشىلىعىمەن قولعا الىنعان اۋقىمدى شارالاردىڭ ماڭىزدىلىعىنا توقتالدى.
«تاۋەلسىز قازاقستاننىڭ قۇرىلۋى مەن بۇگىنگى جەتىستىگى ەلباسى نۇرسۇلتان نازاربايەۆتىڭ ەسىمىمەن تىكەلەي بايلانىستى. مەملەكەت باسشىسىنىڭ جەتەكشىلىگىمەن جۇزەگە اسىپ جاتقان اۋقىمدى ساياسي، ەكونوميكالىق جانە رۋحاني جاڭعىرۋ باعدارلاماسى قازاقستاندى دامىعان 30 ەلدىڭ قاتارىنا قوسادى»، - دەدى الماتى اكىم باۋىرجان بايبەك.
كورمە الماتىدا ەكى ايعا جالعاسادى. كەيىن كوشپەلى كورمە قاراعاندى مەن شىمكەنت قالاسىنا جول تارتادى.
اۆتور: الماس مۇقاش ۇلى
