ءبىر عانا قىزمەتكەرى بار احمەت بايتۇرسىن ۇلىنىڭ ءۇيى
«الاش» پارتياسى، «قازاق» گازەتى، قازاققا جاڭا قارىپ، تورعاي ۋەزى، توتە جازۋ. عالامتورعا وسى تەگتەردى تەرسەڭىز كوگىلدىر ەكراننان دوڭگەلەك كوزاينەك كيگەن، قياق مۇرتتى، سۇلۋ كەسكىندى، ورتاشا عانا بويلى قازاقى ەر ازاماتتىڭ بەينەسىن كورەسىز. كوز الدىڭىزعا مەكتەپ باعدارلاماسىنداعى قازاق ءتىلى كىتابىنىڭ مۇقاباسىنداعى نەگىزگى سۋرەت ەلەستەيدى. ال، استارلى ويمەن سارالاي الساڭىز: تۇرمەگە جونەلتىلگەن ۇلت ۇستازى، قاراڭعى قاپاستا وتىرىپ قاراڭعى قاراشاعا ۇندەۋ تاستاعان اعارتۋشى- عالىم. بۇل ومىرلىك كادرلار احمەت بايتۇرسىن ۇلىنا تيەسىلى.
ءبىز بۇگىن اتىن الەمگە ايگىلى ەتەمىز، قازاقتىڭ ءبىرتۋار ماقتانىشى دەپ ءومىر جولىنا قايران قالاتىن تۇلعامىزدىڭ كوزى تىرىسىندە كورگەن ءومىرى قورقىنىش پەن قاۋىپكە تۇنىپ تۇرعان. تاۋەلسىزدىگى جوق ەلدىڭ قۇرىپ كەتۋ قاۋىپى جوعارى بولعان كەزەڭدە وسى ەلدىڭ ەگەمەندىگىن الام دەپ كەڭەس ۇكىمەتىنىڭ زورلىق- زومبىلىعىن كوپ كوردى. الاش پارتياسى قۇرىلىسىمەن وسى پارتيانىڭ بەلسەندى مۇشەسىنە اينالدى. ساياساتپەن اينالىسا ءجۇرىپ، قازاق ءتىلىنىڭ دامۋىنا ۇلكەن ۇلەس قوسىپ، قازاق ادەبيەتىندە سول زامانعى قاتارلاستارىمەن توڭكەرىس جاسادى. قازاق حالقىنا جاساعان ەلەۋلى ەڭبەكتەرى باسشىلىققا جاقپاۋىنىڭ سالدارىنان ءومىرىنىڭ سوڭىندا اتۋ جازاسىنا كەسىلدى. ارادا 54 جىل ءوتتى. احمەت اتامىزدىڭ ارمانى تولىققاندى ورىندالىپ، ەلىمىز تاۋەلسىز مەملەكەتكە اينالدى. ال، بۇگىندە تاۋەلسىزبىز دەپ اۋىز تولتىرىپ ايتساق تا كەزىندەگى سول احمەتتىڭ ءومىرىنىڭ سوڭىندا وتباسىمەن تۇرعان جالعىز ءۇيىن مەملەكەتتىڭ قاراماعىنا وتكىزە الماي وتىرمىز.
الماتى قالاسى، بايتۇرسىنوۆ جانە جامبىل كوشەلەرىنىڭ قيىلىسىندا ورنالاسقان بۇل ءۇي 1998- جىلدان بەرى مۋزەيگە اينالعان. مۇراجاي ءتوراعاسى - اعارتۋشىنىڭ ۇرپاعى بايتۇرسىنوۆ سەرىك سامىرات ۇلى. مۋزەي دەسە كوز الدىمىزعا سالتاناتتى كيىم كيىپ، كەلگەن قوناقتاردى ەسىكتەن قارسى الاتىن كەسكىندى قىزدار ەلەستەيدى. ال، بۇل مەكەمەدە نەبارى 1 عانا قىزمەتكەر جۇمىس جاساۋدا. قوناقتاردى قارسى الىپ، كورمە زالىمەن تانىستىرىپ ەكسكۋرسيا جۇرگىزەتىن گيد تە، مۇراجايدىڭ اۋلاسىن تازالاپ، ىشىندەگى شاڭ- توزاڭنان ارىلتىپ ەدەنىن جۋاتىن تازالىقشى دا، احمەت مۇرالارىنا باس- كوز بولىپ، عالىمنىڭ شىعارمالارىن قوعامعا ناسيحاتتاۋمەن اينالىساتىن بەدەلدى احمەت تانۋشى دا ءبىر- اق ادام - رايحان ساحىبەك قىزى. «احمەتتىڭ قۇندىلىقتارىن قۇنتتايمىن دەپ كوپشىلىككە سۇيكىمسىز بولدىم، دەسە دە بۇگىنگى قازاق قوعامىنىڭ عالىمعا دەگەن سىيلاستىعىنىڭ ارقاسىندا جۇرتشىلىققا مەن دە جاتتالدىم» - دەيدى مۇراجايدىڭ امبەباپ قىزمەتكەرى.
قازاق ۇلتتىق ۋنيۆەرسيتەتىنىڭ فيلولگيا فاكۋلتەتىندە ساباق بەرەتىن ءمۇعالىمنىڭ ايتۋىنشا سەرىك سامىرات ۇلى 1998 -جىلدان بەرى مۇراجايدى جەكەشەلەندىرىپ العان. ءبىراق، بۇل ۇيگە ارنايى كوڭىل ءبولىپ، ءتىپتى قاراپايىم قۇرىلىس جۇمىستارىن جۇرگىزبەگەن. ەسەسىنە يمانعالي نۇرعالي ۇلى الماتى قالاسىنىڭ اكىمى بولىپ تۇرعانىندا بۇل مەكەمەگە كوڭىل ءبولىپ، ءوز قالتاسىنىڭ قاراجاتىنان تولىققاندى سوڭعى ۇلگىدە قۇرىلىس جۇمىستارىن جۇرگىزىپ بەرگەن. سول مەرزىمنەن بەرى مۇراجاي قابىرعاسىنا سوقىر شەگە دە قاعىلماعان. كەشەگى احمەتتىڭ شاڭىراعى بۇگىنگى قازاقى قوعامنان مەيىرىمدىلىك پەن جىلۋلىق سۇراپ تۇرعانداي. مۇراجايدىڭ جۇمىسىن ىلگەرى جۇرگىزۋ ءۇشىن مەملەكەتتەن كوڭىل ءبولىنىپ، باسشىلىق باسا نازار اۋدارسا احمەت ءۇيى قايتا جاندانار ەدى. كەزىندە احمەتتىڭ قولىنا سالىنعان قارا قۇلىپ بۇگىندە مۇراجاي ەسىگىنە ءجيى تاعىلادى. مۋزەيگە كىرۋگە قىزىعۋشىلىق تانىتقان ازاماتتى وسىنداي پروبلەمالار مازالاماسا نۇر ۇستىنە نۇر بولار ەدى. قازاقتىڭ ەلى جەكە مەملەكەت بولسىن دەپ جان بەرىسكەن ۇلت قايراتكەرىنىڭ مۇراجايى مەملەكەتتىك بولۋعا ءتيىس.
دايىنداعان: اسلان قاجيەۆ
Massaget.kz
