بوتاي مادەنيەتىن جاڭعىرتۋعا رەسەيلىك ماماندار اتسالىسپاق

بۇل تۋرالى اقمولا وبلىسى اكىمىنىڭ كەڭەسشىسى مارات يگاليەۆ ءوزىنىڭ فەيسبۋك پاراقشاسىندا ايتتى، دەپ حابارالايدى قازاقپارات ءتىلشىسى. بۇگىن چەليابى قالاسىندا رەسەي مەن قازاقستاننىڭ ءوڭىرارالىق فورۋمى وتۋدە. فورۋمدا اقمولا مەن چەليابى وبلىستارى اراسىندا ەكىجاقتى ىنتىماقتاستىق ماسەلەلەرى ءسوز بولۋدا. اسىرەسە ءتۋريزمدى دامىتۋعا كوپ كوڭىل بولىنۋدە. وسى ورايدا، اقمولا وبلىسى اكىمىنىڭ كەڭەسشىسى مارات يگاليەۆ بۋراباي كۋرورتىندا بوتاي مادەنيەتى مۇرجايىن جاڭعىرتۋ تۋرالى رەسەيلىك ماماندارمەن كەلىسىم جاسالعانىن اتاپ ءوتتى. وعان قوسا، اتالعان فورۋمدا «چەليابينسك- كوكشەتاۋ» ، «تۇمەن- كوكشەتاۋ» ، «ومبى- كوكشەتاۋ» ، «ەكاتەرينبۋرگ- كوكشەتاۋ» تۋرا اۋەجولىن اشۋ ءسوز بولدى. وسى ماقساتتا كوكشەتاۋ اۋەجايىنىڭ باسشىلىعى رەسەيلىك ارىپتەستەرىمەن كەلىسىم جاساۋدى جوسپارلاپ وتىر.

«كوكشەتاۋدان رەسەي قالالارىنا اۋە جولى ارقىلى تىكەلەي قاتىناۋ. ەكىجاققا دا ءتيىمدى بولاتىنى ءسوزسىز. بۇل ءوز كەزەگىندە وڭىردە تۋريستىك كلاستەردى دامىتىپ قانا قويما، ىسكەرلىك ءتۋريزمدى دامىتۋعا، شەكاراداعى وڭىرلەردىڭ ءبىر- بىرىمەن بايلانىسىن نىعايتۋعا سەپتىگىن تيگىزەتىن بولادى» ، اقمولالىق دەلەگاتسيا مۇشەسى وڭىرلىك كاسىپكەرلەر پالاتاسىنىڭ باسشىسى قايرات سۇلتانوۆ. سونىمەن قاتار، ول بالالار ءتۋريزمىن دامىتۋ قاجەتتىگىنە توقتالدى. ماسەلەن، جاڭا جىلدىق كانيكۋل كەزىندە 2 مىڭ بالا كوكشەتاۋ لاگەرلەرىندە دەمالاتىن بولادى.

 ايتا كەتەيىك، بوتاي مادەنيەتىن جاڭعىرتۋ تۋرالى جاقىندا ايماق باسشىسى مالىك ءمىرزاليننىڭ تاريح عالىمدارىنىڭ دوكتورى، 20- شى عاسىردىڭ جاڭالىعى- بوتاي مادەنيەتىن اشقان ۆيكتور زايبەرت جانە «ەQUUS» كوركەم كينوتريلوگياسىنىڭ پروديۋسەرى نۇربول بايمۇحانوۆپەن كەزدەسۋىندە دە ايتىلدى. كەزدەسۋدە «قازاقستاننىڭ كيەلى جەرلەرى» جوباسى شەڭبەرىندە ارىپتەستىك ماسەلەلەرى تالقىلانعان ەدى. وسى ورايدا، اقمولا وبلىسى اكىمدىگى مەن عالىمدار بىرلەسىپ، بۋرابايدا بوتاي مادەنيەتىن جاڭعىرتۋدى جوسپارلاپ وتىر. ەندى وعان رەسەيلىك ماماندار دا اتسالىسپاق ويدا.

 اۆتور: اسلان وسپانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى