جاڭا فيلىم «اشارشىلىق» تاريحي دراماسىنداعى رولدەردىڭ بىرىنە گولليۆۋد جۇلدىزى شاقىرىلماق
بۇل تۋرالى فيلم رەجيسسەرى مارينا كۋناروۆا «قازاقپارات» تىلشىسىنە بەرگەن سۇحباتىندا ايتتى.
- مارينا، قىركۇيەك ايىندا «اشارشىلىق» دراماسىنىڭ تۇسىرۋگە قازاقستاندىقتاردان 38 ميلليون تەڭگە جينالۋ كەرەكتىگىن ايتقانسىزدار. كراۋدفاندينگ قالاي ءجۇرىپ جاتىر، قاجەتتى سوما جينالدى ما؟
- كراۋدفاندينگ ءجۇرىپ جاتىر، ءبىراق ءبىز ويلاعانداي ەمەس. ال، ەۋروپالىق دەمەۋشىلەرىمىز كەرىسىنشە بەلسەندى. ەۋروپالىق كينو قورى بىزگە فيلمدەگى رولدەردىڭ بىرىنە ا ق ش اكتەرى روبەرت دە نيرونى شاقىرۋ تۋرالى ۇسىنىس جاسادى. ەۋروپالىق تاراپتان بىزدە ەش قيىندىق جوق.
- روبەرت دە نيروعا قانداي ءرول بەرىلمەك؟
- بۇل ماسەلەنى ءالى دە تالقىلاۋ ۇستىندەمىز، سەبەبى ءبىزدىڭ بيۋدجەتىمىز وتە از. روبەرت دە نيرونى جوباعا تارتۋ ءۇشىن بىزگە ەكى مىندەت قويىلدى. ونىڭ ءبىرى - اكتەردىڭ رولىنە بايلانىستى سسەناريدى قايتا جازىپ شىعۋ. ەكىنشىسى، قازاقستاندىق تاراپتىڭ قارجىلىق شىعىننىڭ جارتىسىن جابۋى قاجەت بولىپ تۇر. ەۋروپالىقتار ورتاق جوبا بولعاندىقتان قازاقستاندىقتاردىڭ دا بەلسەندىرەك بولعانىن قالايدى.
- فيلمدى ءتۇسىرۋ جۇمىستارى قاراشا ايىندا باستالادى دەپ جوسپارلانعان ەدى، ناقتى شارالار باستالدى ما؟
- جالپى، فيلم بويىنشا العا جىلجۋ بار. روبەرت دە نيرونىڭ رولىنە بايلانىستى سسەناريدى قازىر قايتا قاراپ جاتىرمىن، الداعى ءبىر- ەكى اپتا ىشىندە ناقتى بەلگىلى بولادى.
- ۋاقىت ءبولىپ سۇحباتتاسقانىڭىزعا راحمەت.
ەسكە سالا كەتەيىك، 2017 -جىلدىڭ قىركۇيەك ايىنىڭ 14-ىندە «MG production» كينوكومپانياسى «ستارت تايم» كراۋدفاندينگ پلاتفورماسىمەن بىرلەسە وتىرىپ، «اشارشىلىق» تاريحي دراماسىن ءتۇسىرۋ جۇمىستارىن باستايتىنىن ءمالىم ەتكەن بولاتىن. فيلم 1931-1933 -جىلدار ارالىعىندا قازاق حالقىنىڭ باسىنان وتكەن اشارشىلىق تاقىرىبىنا ارنالعان.
«بۇل فيلمدى تۇسىرۋگە 1 ميلليون ا ق ش دوللارى كولەمىندە قاراجات قاجەت. ول قاراجاتتىڭ جارتىسىن ەۋروپالىق كينو قورى بەرگەلى وتىر. «MG production» كينوكومپانياسى دا ءوز كۇشىن، تەحنيكالىق مۇمكىندىگىن بەرەدى. ال، حالىقتان، كراۋدفاندينگ ارقىلى قاجەت سومانىڭ 10 پايىزىن عانا جيناماقپىز. ناقتىراق ايتقاندا، ءبىز حالىقتان 38 ميلليون تەڭگە جيناۋ قاجەت. قارجى جيناۋ اكسياسى 31 - جەلتوقسانعا دەيىن جالعاسادى. 38 مىڭ قازاقستاندىق 1000 تەڭگەدەن كومەكتەسسە، سول قارجىنى جيناي الامىز. بۇل - ۇلكەن اسار. تاريحىمىز ءۇشىن بارلىعىمىز بىرىگىپ كومەكتەسەيىك. كومەكتەسكەن قازاقستاندىققا سيفرلىق فورماتتاعى ديسك بەرىلەدى»، - دەگەن بولاتىن «ستارت تايم» كراۋدفاندينگ پلاتفورماسىنىڭ جوبالار بويىنشا ديرەكتورى ءازيزا وتەگەنوۆا.
ءتۇسىرۋ توبىنىڭ ايتۋىنشا، فيلم 2017 -جىلدىڭ قاراشا ايىندا باستالىپ، 2018 -جىلدىڭ اقپان ايىندا اياقتالادى. 2018 -جىلدىڭ كۇزىندە الەمدىك پروكاتقا شىعادى. فيلمنىڭ ۇزاقتىعى - 103 مينۋت.
ايتا كەتەيىك، قازاقستاندا العاش رەت كراۋدفاندينگ ارقىلى «قازاق ەلى» تاريحي كينوسىنا قاراجات جيناۋ جۇرگىزىلگەن بولاتىن. وندا قازاقستاندىقتار 1,3 ميلليون تەڭگە جيناعان بولاتىن.
اۆتور: الماس مۇقاش ۇلى
