ەلباسى قوستانايلىق ديقاندارعا العىسىن ءبىلدىردى
ەلباسى وندا «ميلح» ءسۇت وڭدەۋ زاۋىتىنىڭ جۇمىسىمەن تانىستى.
بۇل سەرىكتەستىك جاقىندا قۇنى 2 ميلليارد تەڭگە بولاتىن ءسۇت ونىمدەرىن شىعاراتىن جاڭا سەحتى ىسكە قوستى. سونداي-اق، ەلباسى ءوز سوزىندە قوستانايلىق ديقاندارعا العىسىن ءبىلدىردى.
«بيىلعى قۇبىلمالى اۋا-رايىنا قاراماستان مول استىق باستىردىڭىزدار. كورسەتكىشتەرىڭىز كوڭىل قۋانتادى. ءبىراق، وبلىستا عىلىمي ورتالىقتار جەتىسپەيدى. ءبيدايدىڭ ساپاسىن ءالى دە ارتتىرۋ كەرەك. استىق سۇرىپىن عىلىمي جاعىنان زەرتتەۋ قاجەتتىلىگى تۋىندايدى. بولاشاقتا مۇنى ەسكەرىڭىزدەر!» - دەپ تاپسىردى پرەزيدەنت.
نۇرسۇلتان نازاربايەۆ سەرىكتەستىك جۇمىسىن ءارى قاراي دامىتۋدى جۇكتەپ، بولاشاقتا ولاردىڭ الەمدىك نارىققا شىعا الاتىنداي بولۋى كەرەكتىگىن ايتتى.
«كاسىپورىن ءوندىرىسىن كەڭەيتۋ تۋرالى بىلتىردان بەرى ايتىلىپ كەلە جاتتى. كوزدەگەن ماقساتقا بيىل قول جەتكىزدىك. ءوندىرىس قۋاتتىلىعى 30 مىڭ تونناعا جەتىپ وتىر. ءبىزدىڭ ءونىم نەگىزگى باسەكەلەستەرىمىزدىكىنەن كەم تۇسپەيدى دەپ نىق سەنىممەن ايتا الامىن»، - دەدى «ميلح» ج ش س باسشىسى سەرگەي بلوك.
«ميلح» ج ش س قوستاناي وبلىسىنداعى ءسۇت ونىمدەرىن دايىندايتىن زاماناۋي ءىرى كاسىپورىنداردىڭ ءبىرى سانالادى. كاسىپورىن العاشقى ءونىمىن 1997-جىلى شىعارعان. فيرما وتاندىق جانە حالىقارالىق ساپا بايقاۋىندا بىرنەشە مارتە ماراپاتتالعان.
ۇستىمىزدەگى جىلى «ميلح» سەرىكتەستىگى ءسۇت ونىمدەرىن ساقتاۋ قويماسى مەن بالمۇزداق ءوندىرىسى سەحىن اشتى. تارتىلعان ينۆەستيتسيا كولەمى - 1,3 ميلليارد تەڭگە.
