موڭعوليادان كەلگەن ورالماندار قازاقستانداعى زەينەتاقىنىڭ ازدىعىنا كۇيىندى
بۇل تۋرالى ءماجىلىس دەپۋتاتى جامبىل احمەتبەكوۆ مالىمدەدى.
قازاقستاندا موڭعوليادان كەلگەن قانداستاردىڭ ەڭبەك ءوتىلىن ەسەپكە الماي وتىرعانىن بىرنەشە جىل بولعان.
كەشە ول ەڭبەك جانە الەۋمەتتىك قامسىزداندىرۋ ءمينيسترى تامارا دۇيسەنوۆاعا دەپۋتاتتىق ساۋال جولداپ، 1990-جىلدارى موڭعوليادان كەلگەن قازاقتاردىڭ ۇندەۋ جازعانىن ايتتى.
«ماجىلىسكە ورالمانداردان ۇندەۋ حات كەلىپ ءتۇستى، ولار 1991-1992-جىلدارى ەلگە موڭعوليادان كوشىپ كەلگەن قانداستارىمىز. ولار وزدەرىنىڭ زەينەتاقىسىنا قاتىستى تۋىنداعان جاعدايلارعا قاتتى الاڭداپ وتىرعانىن حابارلادى»، - دەدى جامبىل احمەتبەكوۆ ءماجىلىستىڭ جالپى وتىرىسىندا.
2014-جىلى 8- ساۋىردەن باستاپ قازاقستان مەن موڭعوليا اراسىندا جاسالعان الەۋمەتتىك قامسىزداندىرۋ سالاسىنداعى ىنتىماقتاستىق تۋرالى كەلىسىمنىڭ كۇشىنىڭ جويىلۋىنا بايلانىستى موڭعوليادان ورالعان قازاقتاردىڭ زەينەتاقىسى كۇرت تومەندەپ كەتكەن. ويتكەنى ورالمانداردىڭ موڭعولياداعى ەڭبەك ءوتىلى ەسەپكە الىنباي وتىر.
مىسالى، موڭعوليادا مەملەكەتتىك قىزمەتتە 46 جىل ەڭبەك ەتكەن ازامات قازىر قازاقستاندا 12850 تەڭگە جاردەماقى الادى ەكەن. 11 مىڭ تەڭگەنى قاناعات تۇتۋعا ءماجبۇر بولىپ وتىرعان ادامدار از ەمەس.
«ماسەلەن، ۇندەۋ جازعان شاياحمەت بۇرقان ۇلى موڭعوليادا 46 جىل بويى مەملەكەتتىك قىزمەتتە جۇمىس ىستەگەن. ونىڭ الاتىن جاردەماقىسى 12850 تەڭگەگە تەڭ. ال جۇقان سالمەن ۇلى مەن بالاپان قابىل قىزى ەسىمدى ورالمانداردىڭ ەڭبەك ءوتىلى مۇلدەم ەسەپكە الىنباستان 11000 تەڭگەلىك جاردەماقى بەكىتىلگەن»، - دەپ ءسوزىن جالعادى دەپۋتات.
ب ا ق دەرەكتەرىنە سۇيەنسەك، موڭعوليانىڭ الەۋمەتتىك قامسىزداندىرۋ مينيسترلىگى ەكى ەل اراسىنداعى كەلىسىمنىڭ كۇشىن جويۋ تۋرالى باستامانىڭ قازاقستان ۇكىمەتى تاراپىنان بولعانىن، ال موڭعول تاراپى اتالعان كەلىسىم بويىنشا ىنتىماقتاستىقتى ودان ءارى جالعاستىرۋعا ءازىر ەكەنىن مالىمدەگەن.
«مەملەكەتتەر اراسىنداعى بۇل كەلىسپەۋشىلىكتەر ەڭ الدىمەن بۇقارا حالىققا سوققى بولىپ تيۋدە. ورالمانداردىڭ ەڭبەك ءوتىلىنىڭ ەسەپتەلمەۋى، ياعني قازاقستان مەن موڭعوليا اراسىندا جاسالعان كەلىسىمنىڭ كۇشىنىڭ جويىلۋى وسى ەلدەن قازاقستانعا قونىس اۋدارىپ جاتقان قانداستارىمىزدىڭ كوشىنىڭ توقتاۋىنا اكەپ سوعۋى مۇمكىن»، - دەگەن الاڭداۋشىلىعىن ءبىلدىردى احمەتبەكوۆ.
كوممۋنيستەر فراكسياسى مينيستردەن بۇل ماسەلەنى ۇكىمەت قاراۋىنا شىعارىپ، ونىڭ شەشىمىن تابۋدى سۇرادى.
