جەزقازعاندا جىراۋ، اقىن، ءبي، شەشەن، باتىر كەتبۇقا باباعا ەسكەرتكىش ورناتىلدى
وكتيابر سەكەمانوۆتىڭ جەتەكشىلىگىمەن، مۇسىنشىلەر اسقار نارتوۆ پەن سەرىك رۇستەمبەكوۆتىڭ قيالىنان تۋىنداپ، قولدارىمەن سومدالعان ءمۇسىن ۇلى جىراۋدىڭ اڭىز بولىپ جەتكەن بەينەسىن بارىنشا اسقاقتاتىپ تۇر. ەسكەرتكىشتىڭ ءوزى قولادان قۇيىلىپ، تۇعىرى گرانيتپەن قاپتالعان. جالپى بيىكتىگى - 10,5 مەتر.
ەسكەرتكىشتىڭ اشىلۋ سالتاناتىنا الىس-جاقىننان كەلگەن حالىق كوپ بولدى. س. قوجامقۇلوۆ اتىنداعى مۋزىكالىق دراما تەاتر ارتىستەرىنىڭ كۇشىمەن قويىلعان كورىنىس كەتبۇقا بابا ومىرىنەن سىر شەرتتى.
«ءبىز تاريحي تۇلعالارىمىزدى تانىماي، دارىپتەمەي، ۇلى تاريحىمىزعا ۇڭىلمەي - العا باسا المايمىز. بۇل تۋرالى ەلباسى دا ۇنەمى ايتىپ وتىرادى. ويتكەنى، 800 جىل بويى ءوزىنىڭ لايىقتى باعاسىن الا الماي كەلگەن بابامىزدىڭ ەسكەرتكىشى بۇگىن ۇلكەن شاھاردىڭ قاق ورتاسىنا ورناتىلدى. كەزىندە ءوزى سان مارتە جورتقان، ءىزى قالعان ۇلىتاۋ وڭىرىنە كەتبۇقا تۇلپارىمەن كەلىپ، تۇعىرعا قونۋى اقىلعا قونىمدى، تاريحي زاڭدىلىق»، - دەدى وبلىس اكىمى ەرلان قوشانوۆ ەسكەرتكىشتىڭ اشىلۋ سالتاناتىندا.
وبلىس باسشىسى ءوز سوزىندە بۇرىن كەتبۇقا ەسىمىن كوپشىلك كۇيشى عانا رەتىندە بىلەتىنىن، ال بۇگىن زەرتتەۋشىلەر بابامىزدىڭ جىراۋ، اقىن، ءبي، شەشەن، باتىر بولعانىن دالەلدەپ وتىرعانىن جەتكىزدى.
«قازاقمىس» كورپوراتسياسى» ج ش س باسقارۋ كەڭەسىنىڭ باس ديرەكتورى باقتيار ءابدىراحمان ۇلى، قازاقستاننىڭ حالىق قاھارمانى مۇحتار التىنبەكوۆ جەرلەستەرىن بابا ەسكەرتكىشىنىڭ اشىلۋىمەن قۇتتىقتادى.
فوتو الەۋمەتتىك جەلىدەن الىندى.
