بەيبىت سەيدۋاليەۆا: ورىسشا وقىدىم، اندەرىمنىڭ ماعىناسىن انام ءتۇسىندىرىپ بەرەتىن
ونىڭ دا ءوز سەبەبى بار. ءبىر كەزدەرى ورىسشا وقىعان سۇيىكتىسىنە سەرىكوۆ ورىسشالاپ جىلى ءسوز ايتقىسى كەلگەن. ءسويتىپ تانىمال «باربي» قۋىرشاعىنا تەڭەيمىن دەپ بەيبىتتى بوربي دەپ اتاعان.
بۇل تۋرالى بەيبىت سەيدۋاليەۆا Zhuldyz.tv ارناسىنىڭ «سەنبىلىك سەرۋەن» باعدارلاماسىندا ايتتى، دەپ جازادى Stan.kz
«مەنىڭ اتا-انام بالالاردىڭ ىشىنەن مەنى عانا ورىس مەكتەبىنە بەردى. ول كەزدە زامان سونداي بولدى. ءتىل ءبىلسىن دەدى، ءسان بولدى. قازىر اعىلشىنشا عوي ءبارى، ول كەزدە ورىسشا ەدى. ءتىپتى، توقتارمەن تانىسقان كەزدە شالا- پۇلا قازاقشا سويلەيمىن. ۇيدەگىلەردىڭ ءبارى قازاقشا تۇسىنبەي قالسام، ورىسشا ءتۇسىندىرىپ جاتادى. جوعارى پەداگوگيكالىق وقۋ ورنىنا تۇسكەن كەزدە ورىس فاكۋلتەتى بولمادى، قازاق فاكۋلتەتىنە تاپسىردىم. مەن تۋرا اعىلشىن ءتىلىن ۇيرەنگەندەي بولدىم. قۇداي ءوزى كەشىرسىن، بۇل ماقتانىش ەمەس، سونداي ءبىر قينالعان ساتتەرىم. ءبىراق جاقسى الىپ كەتتىم، ۇيرەنۋگە تىرىستىم»، - دەپ ءبولىستى بەيبىت سەيدۋاليەۆا.
انا تىلىنە شورقاق بولعان انشىگە ءوز اندەرىنىڭ ماعىناسىن اناسى ءتۇسىندىرىپ بەرىپ وتىرعان.
«توقتار وسىنداي اندەردى ايتا تۇرا، قالاي قازاقشا بىلمەيسىڭ دەپ رەنجيتىن. مەنىڭ انام اۋدارماشىم. مەنىڭ بارلىق ءانىمدى ءتۇسىندىرىپ، كينو ۇقساپ ءتۇسىندىرىپ بەرەدى. سودان مەن ءبارىن جاتتايمىن، ۇعامىن، جۇرەگىمنىڭ ءبىر جەرىنە ساقتاپ الاتىنمىن. سودان ورىس مەكتەبىندە وقىعانىمدى ەستىپ تاڭعالاتىن. ەندى قازىر سەنسەڭىز، ورىسشا سويلەۋدەن قالدىم. ويتكەنى ءۇيدىڭ ءبارى، اينالانىڭ ءبارى قازاقشا»، - دەپ ءتۇسىندىردى بەيبىت.
