قازاقستاندا جەلىدەگى اقپاراتتى باقىلاۋ جۇيەسى ازىرلەنەدى

«ءبىزدىڭ باستى جۇمىس - ينتەرنەتتە، تەلەديداردا تاراتىلاتىن اقپاراتتى باقىلاۋ. الداعى جىلدىڭ سوڭىنا دەيىن باقىلاۋدىڭ اۆتوماتتاندىرىلعان جۇيەسىن ەنگىزبەكپىز. اتالعان جۇيە ينتەرنەتتى باقىلايتىن بولادى، ياعني جەلىدەگى اقپاراتقا شولۋ جۇرگىزەدى. ارينە، بۇل ءۇشىن ۋاقىت كەرەك، سەبەبى ول وڭاي شارۋا ەمەس. ءبىز بۇل جوبانى ىسكە اسىراتىنىمىزعا سەنىمدىمىن»، - دەدى ق ر اقپارات جانە كوممۋنيكاتسيالار ءمينيسترى داۋرەن ابايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قويناۋىن پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا.

سونىمەن قاتار ول قۇقىققا قايشى كونتەنتتى باقىلايتىن قولدانىستاعى جۇيە تۋرالى ايتىپ بەردى. ءبىرىنشى كەزەكتە مينيسترلىك ەسكەرتۋ جولدايدى، كەيىننەن سايتتاردى بۇعاتتايدى.

«بۇل جۇيە قالاي جۇمىس ىستەيدى؟ تەك اعىمداعى جىلى ءبىز ءۇش مىڭعا جۋىق سايتتى بۇعاتتادىق. بۇل شارا قۇقىققا قايشى كونتەنت الىنباعان كەزدە قولدانىلادى. ءبىزدىڭ مينيسترلىك قۇقىققا قايشى ماتەريالدارعا قاتىستى 270 مىڭعا جۋىق ەسكەرتۋدى جولدادى. ياعني لاڭكەستىك، ەكسترەميزم، پورنوگرافيا جانە باسقا دا وسى تەكتەس ماتەريالدار بولعان. ماسەلەن، الەۋمەتتىك جەلىدە ماتەريال پايدا بولدى دەلىك، ءبىز بارشا الەۋمەتتىك جەلىنى ءبىر ماتەريال ءۇشىن بۇعاتتاي المايمىز. سوندىقتان دا جەلىنىڭ اكىمشىسىمەن بايلانىسقا شىعۋعا تۋرا كەلەدى، ال اكىمشى ءوز كەزەگىندە ءتيىستى شارالاردى قابىلدايدى»، - دەپ ءتۇسىندىردى داۋرەن ابايەۆ.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى