نازاربايەۆتىڭ قۇرمەتىنە قويىلعان حريزانتەما جاپونيادا «مارتەبەلى» اتاعىن يەلەندى
بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
جاپونيادا 9 -قىركۇيەك حريزانتەما مەرەكەسىن تويلايدى جانە قاراشا ايى ءداستۇرلى ماۋسىمنىڭ ۇلتتىق گۇلى بولىپ سانالادى. بۇكىل ەل بويىنشا ساياباقتار مەن حرامداردا وتەتىن حريزانتەما فەستيۆالىندە حريزانتەمانىڭ بارلىق پىشىندەرى مەن مىڭداعان تۇرلەرى ۇسىنىلدى.
وسى جىلى جاپون قوعامداستىعىنا العاش رەت «پرەزيدەنت نازاربايەۆ» دەپ اتالاتىن حريزانتەما سۇرىپى ۇسىنىلدى. بۇل گۇل 2016 -جىلى مەملەكەت باسشىسىنىڭ جاپونياعا جاسالعان رەسمي ساپارى بارىسىندا ءوسىرىلىپ، تانىستىرىلعان بولاتىن.
«پرەزيدەنت نازاربايەۆ» حريزانتەماسى 2 مەترگە دەيىن جەتەتىن بيىكتىگى مەن تىعىز ورنالاسقان كۇلتەلەرىمەن ادامنىڭ باسىنا تەڭ كەلەتىندەي سارى تۇينەگىنىڭ كولەمىمەن ەرەكشەلەنەدى. سارى حريزانتەما جاپونيانىڭ سيمۆولى بولىپ تابىلادى جانە يمپەراتور تاعى مەن وسى ەل ازاماتتارىنىڭ ۇلتتىق پاسپورتتارىن اشەكەلەيتىن مەملەكەتتىك گەربىن بىلدىرەدى.
ەلباسىن قۇرمەتىنە وراي اتالعان گۇل ءارتۇرلى بايقاۋلار مەن فەستيۆالدەردە جۇلدەلى ورىندارعا يە بولىپ، فلوريستەر مەن اۋەسقويلار اراسىندا كەڭىنەن تانىلىپ وتىر. اتاپ ايتقاندا، 6 قاراشادا يزۋمي قالاسىندا (وساكا پرەفەكتۋراسى) وتكەن جاپونيانىڭ حريزانتەما فەستيۆالىندە 300 مىڭعا جۋىق گۇلدىڭ اراسىندا «پرەزيدەنت نازاربايەۆ» حريزانتەماسى جاپونيا ءبىلىم، مادەنيەت، سپورت، عىلىم جانە تەحنولوگيالار ءمينيسترىنىڭ، سونداي- اق جالپى ۇلتتىق ىستەرى جانە كوممۋنيكاتسيالار ءمينيسترىنىڭ ارنايى سىيلىعىن يەلەندى.
سونداي-اق، توكيو ۇكىمەتىنىڭ قولداۋىمەن 7 -قاراشادا جاپونيانىڭ حريزانتەما اۋەسقويلارى قاۋىمداستىعى حيبيا ورتالىق ساياباعىندا ۇيىمداستىرعان 95- توكيو حريزانتەما فەستيۆالىندە «پرەزيدەنت نازاربايەۆ» گۇلى «مارتەبەلى» اتاعىنا يە بولدى.
بۇعان دەيىن حريزانتەما سۇرىپتارىنا مەملەكەت باسشىلارىنىڭ ەسىمدەرى بەرىلمەگەن. ولارعا «شىعىس جەلى»، «پاتشا»، «بەس يمپەراتور» سياقتى ليريكالىق سيپاتتاعى جالپىلاما اتاۋلار قويىلىپ كەلگەن.
