گەننادي شيپوۆسكيح: ءبىز لاتىن الىپبيىنە كوشپەيمىز - ورالامىز
«ەلباسىمىزدىڭ ساۋىردە شىققان «رۋحاني جاڭعىرۋ» باعدارلاماسىندا حالقىمىزدىڭ سالت-ءداستۇرىن جاڭعىرتاتىنداي ۇلكەن باعىتتار بەرىلدى. ونىڭ ىشىندەگى ەڭ ۇلكەن جۇمىستىڭ ءبىرى - لاتىن الىپبيىنە كوشۋ. ءبىز لاتىن الىپبيىنە كوشپەيمىز - ورالامىز. سەبەبى، وزدەرىڭىز بىلەتىندەي، 1929 -جىلدان باستاپ 1940 -جىلعا دەيىن ءبىز لاتىن ءالىپبيىن پايدالانىپ كەلدىك. الايدا بەلگىلى ساياسي سەبەپتەرمەن كيريلل قارپىنە اۋىستىق. قوعام وسى تالقىلاۋدىڭ اياسىندا بىرىكتى. ءالىپبيدىڭ ەكىنشى نۇسقاسىن العاشقىسىنان گورى قولداۋشىلاردىڭ باسىم ەكەنىن باقىلاپ وتىرمىز. ءبارى دە بىرتە- بىرتە ورىندالادى. سوندىقتان، ورتاق جۇمىستى بىرلەسىپ، جۇمىلا شەشكەن وڭاي دەگەن ويدامىن»، - دەيدى پارلامەنت ءماجىلىسىنىڭ دەپۋتاتى استانادا وتكەن «جاڭا ءالىپبي - جاڭعىرۋ جولى» تاقىرىبىنداعى دوڭگەلەك ۇستەلدە.
گەننادي شيپوۆسكيحتىڭ ايتۋىنشا، توقسانىنشى جىلدارداعى قيىن كەزەڭدەردە ءالىپبيدى اۋىستىرۋ جۇمىسىن كوپشىلىك ويلاي قويعان جوق. سەبەبى، ءدال سول كەزدە قازاقستاننىڭ الدىندا زاماننىڭ وزگە دە تالاپتارى تۇر ەدى.
«الايدا 25 جىل وتكەن سوڭ ءدال وسى كەزەڭدە ءالىپبيدى اۋىستىراتىن ۋاقىت كەلدى دەگەنگە كامىل سەنەمىن. ءار ادام قازاقستاندا قازاقتىڭ جەرىن باسىپ جۇرگەننەن كەيىن قازاق ءتىلىن ءبىلۋى كەرەك. ەشبىر ءتىلدى شەتتەتپەيمىز. قازاق بولا تۇرا قازاق تىلىندە سويلەي المايتىندار دا بارشىلىق. لاتىن ءالىپبيى ءوز ءتىلىن بىلمەيتىن قازاقتارعا قازاق ءتىلىن مەڭگەرۋدە كەرەمەت مۇمكىندىك دەپ ويلايمىن. سەنات ءتوراعاسى ايتىپ وتكەندەي، بۇل تۇرعىدا قوعامنىڭ پىكىرىن ەسكەرۋىمىز كەرەك. سەبەبى، اقىلداسىپ پىشكەن تون كەلتە بولمايدى»، - دەيدى گەننادي شيپوۆسكيح.
فوتو: parlam.kz
