ايىپ تاعىلعان قۋاندىق بيشىمبايەۆتىڭ اتا-اناسى العاش رەت ەكسكليۋزيۆتى سۇحبات بەردى - فوتو
ەكس-ءمينيستردىڭ اناسى الميرا نۇرلىبەكوۆا ۇلىنا جاسالعان قىسىم تۋرالى ايتىپ، سوتتا ونىڭ قورعاۋشىسى ەكەنىن جەتكىزدى دەپ حابارلايدى 31- ارنا.
ەكس-مينيستر قۋاندىق بيشىمبايەۆقا 7 ءبولىپ، 346 ميلليون تەڭگە پارا الدى جانە قىزىلورداداعى اينەك زاۋىتىنىڭ قۇرىلىسىنا بولىنگەن 1 ميلليارد 200 ميلليون تەڭگەنى جىمقىردى دەگەن ايىپتار تاعىلعان بولاتىن.
ۇلتتىق بيۋرونىڭ مالىمەتىنشە، «بولاشاقتىڭ» تۇلەگى بۇل ىسكە قاراماعىنداعىلارمەن بىرگە تۋعان بولەسىن دە تارتقان. وسى ءىس بويىنشا ايىپتالعان 23 كۇدىكتىنىڭ 20 سى كىناسىن مويىنداسا، بيشىمبايەۆ باستاعان ۇشەۋى عانا كەلىسپەي وتىر.
كىنالارىن مويىنداعاندار اراسىندا «بايتەرەك» باسشىسى بولعان باقىت جاقسىبايەۆ، ونىڭ بۇرىنعى ورىنباسارى، ءماجىلىس دەپۋتاتى قابيبوللا جاقىپوۆتىڭ ۇلى اسلان جاقىپوۆ باستاعان 20 ادام بار.
«ۇلىمدى قاماۋعا العاننان سوڭ، ولار ءوز جاۋاپتارىن وزگەرتىپ، بۇل اقشانىڭ بارلىعىنا قۋاندىقتىڭ قاتىسى بار دەي باستادى»، - دەيدى قۋاندىق بيشىمبايەۆتىڭ اناسى الميرا نۇرلىبەكوۆا.
ال ايىبىن مويىنداۋدان باس تارتقان بيشىمبايەۆقا تەرگەۋ اباقتىسىندا ايلاپ پسيحولوگيالىق قىسىم كورسەتىلدى دەيدى. ەكس-مينيستر ادام زورلاعان كۇدىكتىمەن بىرگە جاتىپ، تاڭعى 6 دان تۇنگى 10 عا دەيىن تار بولمەدە جاتپاق تۇگىلى، وتىرۋعا بولمايتىن اباقتى ازابىن دا تارتقان. الپەشتەپ وسىرگەن جالعىز بالاسىنىڭ جايىن ايتقاندا اناسى كوز جاسىن توقتاتا المادى.
«اكە-شەشەڭ بولمايدى، قايتىس بولىپ كەتەدى. ايەلىڭ كەتىپ قالادى. بالالارىڭ ءوسىپ كەتەدى دەپ جىلايدى. سونداي قاتتى سوزدەردى ايتقان. ال سەن ايىبىڭدى ءوز باسىڭا الاتىن بولساڭ، 15 جىلدان ازايتامىز تۇرمەدەگى ۋاقىتىڭدى دەپ. مەن ويلايمىن پسيحولوگيالىق قىسىم، وعان قاتتى قىسىم بولعان»، - دەيدى اناسى.
ءبىر جىلعا جۋىق سارى ۋايىمعا سالىنعان بۇرىنعى ءماجىلىس دەپۋتاتى بولعان اكەسى وتباسىلىق تراگەديانى كوتەرە الماي جۇرەگىنە وتا جاساتىپتى. قۋاندىقتى اينالاسىنداعىلار ساتىپ كەتتى دەگەن ءۋاليحان بيشىمبايەۆتان بالاسىنىڭ ەڭ ۇلكەن وكىنىشىن دە سۇرادىق.
«ونىڭ ەڭ ۇلكەن وكىنگەنى - ەلباسىنىڭ سەنىمىنەن شىعا الماعانى. باسقاسىن الىپ قويعاندا ءبىرىنشى ورىندا ەلباسى، ول كىسىنىڭ سەنىمى. ارينە بۇل جانۇيامىزعا اتا-اناعا قۋاندىقتىڭ وزىنە ۇلكەن تراگەديا مۇندايدى كۇتپەگەن ەدى»، - دەيدى اكەسى ءۋاليحان بيشىمبايەۆ.
اباقتىنىڭ ازابى مەن ءدۇيىم جۇرتقا ميللياردتاردى جەپ قويدى دەپ اتى شىققانىنا كۇيىنگەن ۇلىمىزدىڭ شاشى اعارىپ، قان قىسىمى كوتەرىلە باستادى دەيدى اتا-اناسى. ءتورت بالاسىنىڭ ۇلكەنى الداعى جىلى مەكتەپپەن قوشتاسسا، ەڭ كىشكەنتاي تورتتەگى قىزى «اكەم قاشان كەلەدى» دەپ كۇندە سۇرايدى ەكەن.
«بالالارى ساعىنادى. تورتتەگى قىزى جىلايدى، پاپا قاشان كەلەدى، دەپ جىلايدى»، - دەيدى قۋاندىق بيشىمبايەۆتىڭ اناسى.
ءبىلىم قۋعانداردىڭ وتباسىنان شىققان، ءۇش ديپلومى بار قۋاندىقتىڭ اتىندا ۇلتتىق بيۋرو ايتقانداي قوسشىدا ميلليوندارعا سالىنعان ءۇيى جوق، دەيدى اناسى.
ايتۋىنشا، ول قۇرىلىسى بىتپەگەن مونشا ەكەن. ال، ۇلدارىنىڭ ءىستى بولۋىنا «شىنى كورولى» اتىمەن شىققان مۇراتحان توقماديدىڭ قاتىسى بولۋى مۇمكىن دەپ تۇسپالدايدى.
ايتپاقشى، ايىپتارىن مويىنداعان بىرنەشە كۇدىكتى سوتتان بوساپ شىقسا، اتا-اناسى تاڭقالمايمىز دەپ وتىر. ال كىمنىڭ اق، كىمنىڭ كىنالى ەكەنىن سوت انىقتايدى.
