قانات يسلام: مەن ەشقاشان وزگە ەلگە كەتپەيمىن
«اتا-بابالارىمىزدىڭ وسىنداي كەڭ جەردى قورعاپ، ەگەمەندىك الىپ، تىنىشتىق ورناتىپ، ۇرپاقتارىنا اماناتتاپ كەتكەنى مەن ءۇشىن ۇلكەن باقىت. ەگەمەندىك، تىنىشتىق بولماسا بۇل جارىس، جەڭىس كىمگە كەرەك شىنىن ايتقاندا؟ كەڭ پەيىل ەلىمىز، دارحان كوڭىل دالامىز، ءبىلىمدى ەلباسىمىز، كوتەرەتىن كوك تۋىمىز بار. سوندىقتان اركىم ءار سالادا قولىنان كەلگەنىنشە جۇمىس اتقارۋى كەرەك دەپ ويلايمىن.
ەر ازامات بولعاننان كەيىن ول - ازاماتتىق بورىشىمىز. مەن ءوز ەلىمنىڭ نامىسىن قورعاپ، كوك تۋىمدى كوتەرىپ ءجۇرىپ شەتەلدە جۇمىس ىستەگەنىمە قۋانىشتىمىن. مەن ەشقاشان وزگە ەلگە كەتپەيمىن. وتباسىم دا، ۇرپاعىم دا، اللا قالاسا، وسى قازاقستاندا ءومىر سۇرەدى»، - دەگەن بوكسشى جەڭىسكە جەتۋ جولىندا جاتتىقتىرۋشىلارىنىڭ ەڭبەگى زور ەكەنىن ايتادى.
«ءبىز قازىر وزىمىزشە جۇلدىز بولىپ حالىقتىڭ الدىندا جۇرگەنىمىزبەن، جاتتىقتىرۋشىلارىمىزدىڭ ەڭبەگى زور. ادام ۇستازىنا قاراپ وسەدى، ەلىكتەيدى. ءوز باسىم ەلدىڭ نامىسىن جوعارى قوياتىن ۇستازدارىم بارىنا قۋانامىن. نۇرعالي ءساپي ۇلى دەگەن ۇستازىم بولدى. ول كىسى مەيىرىمدى، جۋاس كورىنگەنىمەن جارىستىڭ الدىندا جانىڭدى شىعارىپ قينايدى، ايامايدى. ءبىر جارىستا ايتقان ءسوزى ءالى ەسىمدە.
مەنى سىلكىلەپ جاتىپ «قانات، سەن مەنىڭ باتىرىمسىڭ، ۇقتىڭ با؟ سەن جۇلىپ الۋ كەرەكسىڭ» دەپ كوزى جانىپ ايقايلاپ جاتتى. ول ءسوزدى ەستىگەندە مەن شارشاعانىمدى ۇمىتىپ، ورنىمنان قالاي اتىپ تۇرعانىمدى بىلمەي قالعان بولاتىنمىن. سونداي مىقتى جاتتىقتىرۋشىلاردىڭ ارقاسىندا وسى جەردە وتىرمىز»، - دەيدى بوكسشى.
ءتورت بالانىڭ اكەسى جەتىستىككە جەتۋىنە اسىل جارىنىڭ تاراپىنان كورسەتىلەتىنىن قولداۋدىڭ دا وتە جوعارى ەكەنىن ايتادى.
«ەر جىگىتتىڭ ءۇش جۇرتى بار دەپ ايتادى عوي قازاق. اللاعا شۇكىر، ءۇش جۇرتىمنىڭ دا كومەگىن، قولداۋىن الىپ جاتىرمىن. ەڭ باستىسى جارىمنىڭ بالا-شاعامدى تىنىش ۇستاپ، ءۇيىمنىڭ ءتۇتىنىن ءتۇزۋ شىعارىپ وتىرعانى مەن ءۇشىن ۇلكەن كومەك.
قازىرگى تاڭدا 4 بالانىڭ اكەسىمىن. ەردى ەر قىلاتىن دا جەر قىلاتىن دا ايەل. جارىڭىز ويلاعان ويىڭىزدى قۇرمەتتەمەسە، قولداماسا ەر ازاماتتىڭ ەركىن جۇمىس ىستەپ كەتۋى قيىن بولادى. سول سەبەپتى جارىمنىڭ تاراپىنان قولداۋ وتە جوعارى. كەيدە جارىستارعا كەتكەندە بالالارىمنىڭ اۋىرىپ قالعانىن ايتپاي جاسىرىپ وتىرادى. جارىس بىتكەن سوڭ ءبىلىپ جاتامىن. ماڭايىمداعى تۋىس-تۋعانىم، دوس جاراندارىم دا مەنى ۇنەمى قولداپ جۇرەدى»، - دەيدى بوكسشى.
