الماتى وبلىسىندا ءبىر توپ ورالمان ازاماتتىق الا الماي ءجۇر - فوتو
ءتىپتى ارالارىندا ون جىلدان بەرى تۋعان جەردە تۇراقتاپ قالۋعا مۇمكىندىك بەرەتىن قۇجاتقا قول جەتكىزە الماي، ساندالىپ جۇرگەندەرى دە بار، دەپ حابارلايدى قازاقپارات ءتىلشىسى.
«مەن كەلگەلى 10 جىل بولدى. ءالى قىتايدىڭ پاسپورتىن ۇستاپ ءجۇرمىن. ۋاقىت بىتكەن دەپ، جاڭالاتىپ الىپ كەلدىم. ەندى قىتايعا بارىپ كەلەسىڭ، ءبىر جىل قىتايدا تۇراسىڭ دەيدى. مىناۋ ەكى-اق ايعا تىركەلگەن ەكەن. مىنا جاقتا بالا-شاعام بار، ەندى نە ىستەرىمدى بىلمەيمىن. ەلىم-جەرىم، وتانىم دەپ كەلدىم عوي»، - دەيدى ءپازىل ءالىم.
تالدىقورعان قالاسىنداعى وبلىستىق كوشى-قون باسقارماسىنىڭ الدىنا جينالعان ءبىر توپ اعايىننىڭ باسىنداعى پروبلەما وسى ەكەن. ماسەلەن، اقاي كۇلشارا 7 جىلدان بەرى اتالعان قۇجاتقا قول جەتكىزە الماي كەلەدى.
«2013 -جىلى ماعان ازاماتتىق بەرىلسىن دەپ ۇ ق ك رۇقسات بەرگەن. قۇجاتىمدى تاپسىرعان، مىنە ءبارىن بەرگەن. ءبىراق وسى قاعازدى الا الماي ءجۇرمىن. مەن قىتايدىڭ پاسپورتىن ۇستاپ جۇرگىم كەلمەيدى. قىتايعا قايتا ورالعىم كەلمەيدى. مەن ءوز ەلىمدە تۇرعىم كەلەدى»، - دەيدى ول.
ال وبلىستىق كوشى-قوننىڭ ازاماتتىق بولىمىنە ەندى عانا باسشى بولعان شەنەۋنىك ءارقايسىسىنىڭ ماسەلەسىمەن تانىسامىن دەپ ۋادە بەردى.
«ازاماتتىققا قابىلدامايدى دەگەن ءسوز جوق. ءبارى قابىلدانادى. ءبىراق ءارتۇرلى تارتىپپەن قابىلدانادى. ءارقايسىسىن جەكە قاراستىرايىن، سوسىن قالاي جاۋاپ بەرۋ كەرەك ەكەنىن ءوزىم ءتۇسىندىرىپ ايتايىن»، - دەدى الماتى وبلىستىق كوشى-قون قىزمەتى باسقارماسى ازاماتتىق ءبولىمىنىڭ باستىعى تولەۋجان جۇندىبايەۆ.
قانداستارىمىز نە بالالارىنا، نە وزدەرىنە ازاماتتىق بۇيىرماي، دۇنيە-مۇلىكتى ازاماتتىعى بار ادامنىڭ اتىنا اۋىستىرىپ، ۇرەيمەن كۇن كەشىپ، جالتاقتاۋدان جالىقتىق دەيدى. ءتىپتى كەيبىرى ازاماتتىق الامىن دەپ جۇگىرىپ ءجۇرىپ، ورالمان كۋالىگىنىڭ دە مەرزىمىن وتكىزىپ العان.
«ورالمان كۋالىكتىڭ ۋاقىتى سوزىلسا، ازاماتتىققا قابىلدايدى ەكەن. ءبىراق ورالمان كۋالىكتى سوزاتىن قيسىن جوق، سونىمەن تۇرمىز»، دەيدى ەسكەلدى اۋدانىنىڭ تۇرعىنى بەكسەرىك زەينەش.
تىعىرىققا تىرەلدىك دەگەن اعايىن ەندى ەرتەڭگى كۇندەرىنە الاڭداۋلى.
