ەرىنگە قاجەتتى دارۋمەندەر

مۇنداي پروبلەما باستالماس بۇرىن ەرىن ازداپ قۇرعاي باستايدى. ءبىز ونىڭ سەبەبىن اۋا رايىنان (جەل، اياز) كورە سالامىز. سودان سوڭ «ۇلعايتىپ المايىق» دەگەن ويمەن ەرىنگە كرەم نەمەسە بالزام جاعىپ قويامىز. ارينە، اۋا رايى تەرىگە جانە ەرىنگە دە اسەرىن بەرەدى، الايدا كوپ جاعدايدا يممۋندىق جۇيەنىڭ بۇزىلۋى ەرىننىڭ جارىلۋىنا اكەلىپ جاتادى. ەرىن بارلىق سىرتقى جانە ىشكى اسەرلەردى قابىلدايدى. نەگىزگى سىرتقى اسەرگە جوعارىدا ايتىلعان اۋا رايى جاتادى. سونىمەن قاتار وعان كەڭسەدەگى جانە ۇيدەگى وتە قۇرعاق اۋا جاتادى. قالاداعى شاڭ- توزاڭ جانە حلورلانعان سۋمەن ءجيى جۋىنۋ ەرىنگە كەرى اسەرىن بەرەدى. سىرتقى سەبەپتەر ىشكىمەن تىعىز بايلانىستى. دۇرىس تاماقتانباۋ، سۋدى از ءىشۋ اعزانىڭ اۋرۋىنا اكەلىپ سوعادى. ول اۋرۋ ەرىننىڭ قاتتى ءتىلىنىپ، جارىلۋىمەن بەلگى بولىپ بەرىلەدى.

ەرىنگە ا، ە، س، F جانە ۆ دارۋمەندەرى وتە قاجەت. ۆ توبىنىڭ ىشىنەن ەرىنگە ۆ2 مەن ۆ3 دارۋمەندەرى ماڭىزدىراق. بۇل ايتىلعان دارۋمەندەرگە كەپتىرىلگەن ساڭىراۋقۇلاق، سيىردىڭ وكپەسى مەن باۋىرى، قۇرعاق ءسۇت جانە جۇمىرتقا ۇنتاعى باي بولىپ كەلەدى. ا دارۋمەنى سيىر وكپەسىندە، ءسابىز، قىزىل شەتەن، جىلانبالىق، جۇمىرتقانىڭ سارىسى، اقجەلكەن، ەرىتىلگەن سارى ماي جانە ورىكتە كەزدەسەدى. ە دارۋمەنى كۇنباعىس مايى، شەكىلدەۋىك، ءتۇرلى جاڭعاقتار، ءبيداي كەبەگى جانە كەي بالىق كونسەرۆىلەرىندە (سكۋمبريا، مايبالىق) بولادى. س دارۋمەنى يتمۇرىن، شىرعاناق، قاراقات سەكىلدى جيدەكتەردە، اقجەلكەن، اسكوك، ءتاتتى بۇرىش، قىرىققابات كوكونىستەرىندە جانە جەمىستەردە بولادى.

 F دارۋمەنىنسىز زات الماسۋ قالىپتى جۇرمەيدى. ەگەر بۇل دارۋمەن از بولسا، تەرىگە بەزەۋلەر مەن داقتار شىعا باستاپ، ەرىن قۇرعاپ، جارالانا باستايدى. ءدارىحانالاردا F دارۋمەنى بار ەرىنگە ارنالعان بالزامدار ساتىلادى. F دارۋمەنىنە وسىمدىك مايلارى (كۇنباعىس، سويا، زىعىر) ، جاڭعاقتار، كەي كەپتىرىلگەن جەمىستەر جانە بالىق مايلارى باي. ەگەر دارىگەر ۇسىنسا، ءدارىحانادا ساتىلاتىن دارۋمەندەردى ىشۋگە بولادى. الايدا تاعامنىڭ قۇرامىنداعى دارۋمەندەر اعزاعا جىلدام ءارى جاقسى سىڭىرىلەتىنىن ەستە ساقتايىق.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى