وسكەمەندىك جازۋشى بوريس شەرباكوۆ ابايدىڭ تۋعان جەرى تۋرالى كىتاپ جازدى
ولكە تانۋشىنىڭ تىڭ تۋىندىسى قازاق جانە ورىس تىلىندە وقىرمانعا جول تارتتى، دەپ حابارلايدى «قازاقپارات» ح ا ا ءتىلشىسى.
ولكە تانۋشى كىتاپتى جازۋ ءۇشىن اباي اۋدانىنداعى ۇلى اقىننىڭ تۋعان جەرىن ارالاپ، «اباي- شاكارىم» مەموريالدىق كەشەنىن بىرنەشە جىل بويى زەرتتەگەن. قازاقتىڭ ۇلى تۇلعاسى دۇنيەگە كەلگەن مەكەن ەۋرازيا كەڭىستىگىنىڭ تۋرا ورتاسى - كىندىك نۇكتەسى ەكەنى بەلگىلى. جاس كەزىنەن شىعىستىڭ شىرايلى مەكەنىن ارمانسىز ارالاعان بوريس شەرباكوۆتىڭ تۋىندىسىنىڭ تۇساۋكەسەرىنە ءبىرقاتار زيالى قاۋىم وكىلدەرى قاتىستى. بوريس شەرباكوۆتى جەرلەستەرى بيولوگيا عىلىمدارىنىڭ دوكتورى، قازاقستان رەسپۋبليكاسىنىڭ جازۋشىلار وداعىنىڭ مۇشەسى، شىعىس قازاقستان وبلىسى اكىمىنىڭ ارنايى سىيلىعىنىڭ لاۋرەاتى، بىلگىر ورنيتولوگ رەتىندە تانيدى. كىتاپ جازۋمەن بىرگە ورنيتولوگ ءوڭىردىڭ اڭ- قۇستارىنىڭ احۋالى ماسەلەسىن ءجيى كوتەرىپ، قوعامدىق جۇمىستارعا بەلسەنە ارالاسىپ ءجۇر.
«وسى تۋىندىنى جازۋدا كوپ ەڭبەكتەندىم. نەلىكتەن اباي تۋرالى جازۋدى ۇيعاردىم؟ .. ۇلى اقىننىڭ ۇلىلىعىن سوزبەن جەتكىزۋ مۇمكىن ەمەس. سول سەبەپتى، ابايدىڭ ءجۇرىپ وتكەن جولدارىن، ونىڭ ولمەس تۋىندى جازعان ءوڭىردىڭ قاسيەتىن وقىرمانعا سەزدىرە بىلۋگە تىرىستىم»، - دەيدى بوريس شەرباكوۆ.
اۆتور ءوز كىتابىندا جالعىز اقىننىڭ عانا ومىرىنە توقتالىپ قالماي، قازاق اتىن الەمگە پاش ەتكەن، وسى ءوڭىردىڭ تۋمالارى تۋرالى دا جازىپ وتكەن. كىتاپتىڭ ءار تاراۋى اباي قۇنانباي ۇلىنىڭ ءومىرى تۋرالى كەرەمەت سىر شەرتىپ، جيداباي ءوڭىرىنىڭ قاسيەتتى مەكەن ەكەنىن پاش ەتە تۇسەدى.
«بوريس شەرباكوۆ اباي تۋرالى تۋىندى جازا وتىرىپ، ۇلى اقىننىڭ ءومىرىن زەرتتەۋدە تىڭعا تۇرەن سالا ءبىلدى. ءوز باسىم جازۋشىنىڭ اباي جايلى كىتاپ جازۋعا جىلدار بويى وقتالىپ جۇرگەنىن بىلەتىن ەدىم. ۇلى دالاعا دەگەن شەكسىز ماحاببات جازۋشىنى وسى تۋىندىنى دۇنيەگە اكەلۋگە جەتەلەدى»، - دەيدى بيبليوگراف جاننا ساقپانوۆا.
اۆتور: ايان بەكەن ۇلى
