قورعانىس مينيسترلىگى قازاقستاندىق اسكەري قىزمەتشىلەردىڭ ەڭ تومەنگى جالاقىسى قانشا ەكەنىن ايتتى
«بۇگىنگى تاڭدا وفيتسەرلەردى ماراپاتتاۋ ەسەلەپ ارتتى. اسكەري قىزمەتشىلەردىڭ اقشالاي قاراجاتتارى %25 كە كوبەيدى. قازىر ءبىزدىڭ وفيتسەرلەر الاتىن ەڭ تومەنگى جالاقى 170 مىڭ تەڭگە، ال كەلىسىمشارت بويىنشا قىزمەت وتكەرەتىندەر 100 مىڭ تەڭگە الادى. بۇرىن جالاقى ايتارلىقتاي از بولاتىن»، - دەپ مالىمدەدى ادىلەت پولكوۆنيگى قايرات كوپبايەۆ.
دەپارتامەنت باسشىسى جالاقىسى كوبەيگەننەن كەيىن قازاقستاندىق اسكەري قىزمەتشىلەردىڭ قىزمەتتى وتكەرۋگە دەگەن ىنتاسى ارتا تۇسكەنىن تىلگە تيەك ەتىپ، ارمياعا بارعىسى كەلەتىندەردىڭ سانى جىل سايىن %30-35 كە ارتىپ كەلە جاتقانىن ايتتى.
«قازىر ارميادا قىزمەت ەتۋ - ابىرويلى ءىس. سوندىقتان دا كانديداتتاردى ىرىكتەۋ تالاپتارىن قاتاڭداتامىز. كانديداتتاردىڭ پسيحوفيزيولوگيالىق كۇيىنە ەرەكشە ءمان بەرىلەدى»، - دەدى قايرات كوپبايەۆ.
